Qostanaıda kópqabatty úı órtenip, eki adam zardap shekti
«17 qarasha kúni saǵat 23:28-de Qashar kenti 13-ÓSB kezekshi pýltine kópqabatty turǵyn úıdegi órt týraly qońyraý tústi. Oqıǵa týraly jergilikti polıtsııa bóliminiń qyzmetkerleri habarlady. Qutqarýshylar 5 qabatty turǵyn úıdiń 3-shi qabatyndaǵy páterdiń janyp jatqanyn anyqtady. Órt shamamen 10 sharshy metr aýmaqty sharpydy. Tútin kórshi páterlerge tarala bastady», - delingen vedomstvo habarlamasynda.
Órt sóndirýshiler edende jatqan 60 jastaǵy páter ıesin alyp shyqty. Onyń eki qoly, keýdesi men arqa bóligin kúıik shalǵan. Sondaı-aq qutqarýshylar ıis tıip ýlanǵan 79 jastaǵy áıelge kómekke keldi. Ol baspaldaq alańynan tabyldy.
Taǵy 20 adam baspaldaq arqyly qaýipsiz aýmaqqa evakýatsııalandy.
Jedel járdem kóligi zardap shekken eki adamdy jergilikti aýrýhanaǵa jetkizdi.
«Olardyń bireýiniń jaǵdaıy - ortasha aýyrlyq deńgeıinde», - deıdi TJD-nyń baspasóz hatshysy Ýálıhan Dosanov.
Turǵyn úı órtin sóndirýge Qostanaı oblysy TJD Órt sóndirý qyzmetiniń jeke quramynan 7 adam jáne 2 arnaıy tehnıka jumyldyryldy. Sondaı-aq gaz-tútinnen qorǵaý qyzmetiniń mamandary jumys istedi. Órt saǵat 23:59-da tolyqtaı sóndirildi. Oqıǵa sebebi anyqtalýda.
