Qostanaıda kópirden sekirmek bolǵan áıel qutqaryldy

ASTANA. QazAqparat – Qostanaıda kópirden sekirgisi kelgen áıel qutqaryldy. Polıtseıler jetkenshe onyń aman qalýyna jergilikti turǵyn kómektesken, dep habarlaıdy QazAqparat rolisia.kz saıtyna silteme jasap.

Búgin saǵat 14:10-da 102 pýltine kópirden sekireıin dep turǵan áıel týraly habarlama túsedi. Bul aqparatty sol mańnan ótip bara jatqan kólik júrgizýshisi jetkizipti. «Tezirek kelińizder, men ony qutqarýǵa tyrysamyn» degen er adam. Oqıǵa ornyna polıtsııa aǵa leıtenanty Jalǵas Shonov pen polıtsııa kapıtany Dýlat Armanov tez arada jetedi.

«Biz kelgen kezde er adam áıeldiń qolynan ustap turdy. Ony kópir ústine shyǵarýǵa tyrysyp jatty», - deıdi Jalǵas Shonov.

Polıtseıler áıeldi shyǵaryp, ony polıtsııa kóligine otyrǵyzǵan. «Qutqarylǵan adamnyń jaǵdaıy onsha emes boldy, tipti aty men tegin de aıta almady. Bizge ony shuǵyl túrde polıtsııa bólimshesine jetkizýge týra keldi», - deıdi Dýlat Armanov.

Abyr-sabyr kezde oqıǵa ornynda birinshi bolyp tabylǵan júrgizýshi polıtseılerdiń áıelge alǵashqy medıtsınalyq kómek kórsetkenine kóz jetkizip, ketip qalǵan.

«Qıyn jaǵdaıdaǵy batyl áreketi men kómegin atap ótý úshin biz erjúrek qostanaılyqtan habar kútemiz», - dedi polıtsııadan.

Foto: polisia.kz