Qostanaıda kópbalaly otbasyna baspana berildi
Buǵan deıin habarlaǵanymyzdaı, «Nur Otan» partııasy Elbasynyń tapsyrmasy boıynsha kópbalaly, áleýmettik jaǵynan az qamtylǵan otbasylardy qoldaýǵa baǵyttalǵan «Baqytty otbasy» jobasyn bastady. Atalǵan joba aıasynda Tobyl eldi mekeninde turatyn Smırnovtar otbasyna turǵyn úı berildi. Otaǵasy Andreı Smırnovtyń aıtýynsha, bul kútpegen syılyq boldy.
«Biz 5 bala tárbıelep otyrmyz. Rasynda da, úıimizdiń tozyǵy jetken edi, jylý ustamaıdy, elektr jaryǵy da birde bar, birde joq. Bizge osyndaı qýanysh syılaǵan janashyrlarǵa alǵysym sheksiz», - deıdi ol.
Turmysy tómen januıaǵa jańa úıdiń kiltin «BK-Stroıprom» JShS tapsyrdy.
«Búgin kópbalaly otbasyǵa qol ushyn sozdyq. Óńirdegi barlyq kásipkerdi, shaǵyn jáne orta bıznes ókilderin osyndaı januıalarǵa kómektesýge shaqyramyn. Qoldaýǵa muqtaj, jaǵdaıy tómen mundaı shańyraqtar nazardan tys qalmaýy tıis», - deıdi seriktestik dırektory Sergeı Kım.
«Nur Otan» partııasy oblystyq fılıalynyń málimetinshe, Taran aýdanynda jyl basynan 20 aqpanǵa deıin júz otbasyǵa kómek kórsetilgen. Oǵan 826 900 teńge jumsaldy. 86 otbasy azyq-túlik, 6 januıa qatty otyn, 4 úı aqsha túrinde kómek alǵan.
