Qostanaıda kómir tapshy: Oblystyq ákimdik jaǵdaıdy túsindirdi

QOSTANAI. QazAqparat – Bir adamǵa tek 5 tonnadan kómir berilip jatyr. Qostanaı oblysynyń bıligi bul máseleni jeltoqsannyń ekinshi jartysyna qaraı tolyq sheshpekshi, dep habarlaıdy QazAqparat tilshisi.

Bul jaǵdaıdy Qostanaı oblysy ákiminiń birinshi orynbasary Ǵaýez Nurmuhambetov túsindirdi.

Qazirgi ýaqytta Qostanaı oblysynyń 12 óńirinde 25 temirjol kómir tuıyǵy bar. Kómir tuıyqtarynyń kireberisteri, jeńil jáne júk kólikterine arnalǵan turaqtary bar.

«Qarashanyń aıaǵyndaǵy jaǵdaı boıynsha oblystaǵy tuıyqtarda 16 myń 390 tonna túrli markaly kómir bar. «Bogatyr» tuıyǵyndaǵy kómirdiń ortasha baǵasy 12 myń teńge, «Maıquba» 13400 teńge, «Shubarkól» - 16500 teńge. Osy jyldyń qarashasynda bizdiń óńir kómir jetkizý boıynsha josparlanǵan kesteden qalyp qoıdy, osyǵan baılanysty oblystyń keıbir aýdandarynda kómir jetpeı jatyr. Tuıyqtarda kómir qalmaǵan nemese óte az qalǵan», - dedi oblys ákiminiń orynbasary.

Qostanaı oblysynda qarashanyń sońynda 58991 tonna kómir jetkizilgen.

Óńirdegi kómir tapshylyǵynyń basty sebebi – ashyq vagondardyń jetispeýi, sondaı-aq jóneltý stansalaryndaǵy kideris.

«Qazirgi ýaqytta óńirde kómirge baılanysty jaǵdaı turaqtaldy. Satatyn oryndarda qyzý jumys júrip jatyr, jedel brıgadalar quryldy. Kómir belgili bir kólemde satylyp jatyr – bir qolǵa 5 tonnadan», - dedi oblys ákiminiń birinshi orynbasary.

Sondaı-aq, óńirde belgilengen jerge deıin kedergisiz jetkizý boıynsha jedel shtab quryldy.

«Jeltoqsanda 64 myń 500 tonna nemese 907 ashyq vagon kómir jóneltý josparlanyp otyr. Bul másle oblys basshylyǵynyń jiti baqylaýynda. Jeltoqsannyń ekinshi jartysynda kómir tapshylyǵy máselesi tolyq sheshiledi», - dep túıindedi Ǵaýez Nurmuhambetov.