Qostanaıda kolonııa basshysynyń orynbasary súıiktisin «jumysqa alǵany» úshin sottaldy
QOSTANAI. QazAqparat - Qostanaıdaǵy №2 qalalyq sotta ÝK161/2 mekemesi basshysynyń burynǵy orynbasary Inna Karkavınaǵa qatysty is qaralyp jatyr. Oǵan laýazymyn teris paıdalandy degen aıyp taǵylyp otyr, dep habarlaıdy QazAqparat tilshisi.
Anyqtalǵandaı, áıel 2015 jyly birge turatyn er azamatyn kolonııaǵa júrgizýshi etip jumysqa ornalastyrǵan. Іs materıaldaryna qaraǵanda, 2015 jylǵy 25 sáýirde I.Karkavına óz áriptesi, tyldyq qamtý bóliminiń ınspektorynan súıiktisin júrgizýshi etip qabyldaýdy ótingen.
Másele dereý sheshimin taýyp, ol jumysqa alynǵan. Biraq er adam jumys ornynda birde-bir ret tóbe kórsetpegen. I.Karkavına qolastyndaǵy qyzmetkerge kún saıyn oryndalǵan jumystar jýrnalyna belgilep otyrýdy tapsyrǵan, jol qaǵazdary men benzın talondaryn berip kelgen.
Osylaısha, ol 2015 jyldyń 23 sáýirinen 2017 jylǵy 30 maýsymǵa deıin kalonııada «jumys istep júrgen». Karkavına osy arqyly jalpy quny 280 myń teńge bolatyn 2 440 lıtr benzındi jáne jalaqy túrindegi 1,5 mln teńgeni jymqyrǵan.
Sot otyrysynyń qorytyndylaryna oraı, I. Karkavına óz aıybyn tolyq moıyndap, protsestik kelisim jasaý týraly ótinish berdi.
