Qostanaıda kóliktegi eki adam qar qursaýynda qalyp qoıdy
QOSTANAI. QazAqparat - Qostanaı aýdanynyń Sýrıkov aýyly mańynda eki er adam kólikpenen qar qursaýynda qalyp qoıǵan, dep habarlaıdy «Qazaqparat» HAA tilshisi Soltústik óńirlik aeroutqyr jasaǵy bastyǵynyń orynbasary Sergeı Shmıdtke silteme jasap.
Belgili bolǵandaı, 26 qańtarda eki jas jigit «Volga» kóligimen Sýrıkov aýylynan Reseı shekarasyna qaraı bet alǵan. Olar jol qysqartý maqsatynda Voskresenov selosy arqyly júrmek bolady. Alaıda, ekeýi joldan shyǵyp, adasyp ketken.
«Osy kúni aýa temperatýrasy 30 gradýsqa deıin tómendegen. Olar navıgatordyń kómegine súıenip, aldymen, aýyl ishindegi jolmen, keıin jolsyz dalaǵa shyǵyp ketken. Qutqarýshylar izdestirý jumystaryna tek 19:00-de kiristi. Qar qursaýyndaǵylardy avtokóliktiń synǵan bólikteri arqyly taptyq»,- dedi S. Shmıdt.
Arnaıy jasaq qyzmetkerleriniń aıtýynsha, kólikte jyly kıim, qar arshıtyn quraldar, janarmaı bolmaǵan.
«Mundaı aýa raıynda adam ómirin saqtap qalýǵa bolatyn qarapaıym nárselersiz alys jolǵa shyǵýǵa bolmaıdy. Eger bul aýyl mańynda baılanys júıesi bolmaǵanda, jaǵdaı qaıǵyly aıaqtalýshy edi», - dep esepteıdi Shmıdt.
Qutqarýshylar er adamdardy Qostanaı aýdanynyń Ozernyı kentine deıin jetkizdi.
