Qostanaıda kólik órtenip, bir adam kóz jumdy
QOSTANAI. QazAqparat – Qostanaı oblysynyń B. Maılın aýdanynda omartashy tirkemesi tirkelgen avtokólik janyp, bir adam kóz jumdy, dep habarlaıdy QazAqparat tilshisi.
Qostanaı oblysy TJD baspasóz qyzmetiniń habarlaýynsha, tirkemesi bar kólik B.Maılın aýdany Barsýkovka aýylynyń mańynda turǵan.
«Omarta jáne avtokólik tirkemesi bar «Gaz-53» markaly kólik tolyq janyp ketti. Denesiniń 98%-yn kúıik shalǵan 1955 jyly týǵan azamat Lısakov ortalyq aýdandyq aýrýhanasyna tústi», - dedi TJD baspasóz qyzmetindegiler.
Er adam aýrýhanada qaıtys boldy. TJD mamandary órt kezinde jınalǵan materıaldardy aýdandyq polıtsııa bólimine tergeý úshin jiberdi. Aldyn ala boljam boıynsha, órt otty abaısyz paıdalanýdan shyqqan.
