Qostanaıda kóligine jalǵan nómir taqqan aýdandyq polıtsııa bastyǵy jumystan ketti

QOSTANAI. QazAqparat – Qostanaı oblysynyń Sarykól aýdanynda polıtsııa bóliminiń bastyǵy Qaırat Ábdiqalyqov jalǵan nómiri bar jumys kóligin paıdalanǵany túsip qalǵan vıdeodan keıin otstavkaǵa ketti, dep habarlaıdy QazAqparat tilshisi.

Atalǵan faktige qatysty Qostanaı oblysy polıtsııa departamentiniń baspasóz qyzmeti túsinik berdi. Vedomstvoda habarlaǵandaı, QR ІІM-de polıtsııany reformalaý aıasynda basty basymdyq belgilengen. Ol – jeke quram arasynda zańdylyq pen tártipti saqtaý.

«Youtube-te jarııalanǵan vıdeo boıynsha Qostanaı oblysynyń PD Sarykól aýdanynyń polıtsııa bóliminiń bastyǵy Qaırat Ábdihalyqovtyń zańsyz áreketi týraly qyzmettik tergeý júrgizildi. Memlekettik qyzmetshiniń Ádep kodeksiniń talaptaryn buzǵany úshin Sarykól aýdandyq PB polıtsııa qyzmetkerleri qatań tártiptik jaýapqa tartyldy», - dep habarlady polıtsııa agenttik tilshisine.

Sonymen qatar, júrgizýshini ákimshilik jaýapqa tartý úshin materıal Qostanaı oblysy PD jergilikti polıtsııa qyzmeti basqarmasyna joldandy. «Osydan keıin Sarykól aýdanynyń polıtsııa bastyǵy Qaırat Ábdihalyqov qyzmetinen bosatý týraly baıanat jazdy», - dep tolyqtyrdy polıtsııa departamentiniń baspasóz qyzmeti.

Avtory Janna Musabaeva