Qostanaıda qoqys tasıtyn júk kólikteri shyǵarylady
QOSTANAI. QazAqparat - «Allıýr» Kompanııalary» toby Qostanaıdaǵy «SaryarqaAvtoProm» JShS bazasynda qatty turmystyq jáne ónerkásiptik qaldyqtardy jınap, tasymaldaıtyn kólik shyǵarýdy qolǵa alady, dep habarlaıdy QazAqparat «SaryarqaAvtoProm» JShS baspasóz qyzmetine silteme jasap.
Búginde kompanııa qoqys tasıtyn JAC markaly júk kólikteriniń 9 túrin shyǵaryp jatyr. Sondaı-aq, Iveco 682 markaly taǵy úsh nusqa qurastyrylýda. Bul kólikter kommýnaldyq qyzmettiń muqtajyn óteýge arnalǵan. Ótken jyly dál osyndaı 96 kommertsııalyq kólik paıdalanýǵa berildi.
Jalpy, «SaryarqaAvtoProm» JShS jyl saıyn óndiristi jańǵyrtyp, kólik qurastyrý kólemin ulǵaıtyp keledi. Ótken jyly tutynýshylardyń suranysymen turmystyq qaldyqtar jınaýǵa arnalǵan eki synamaly kólik shyǵarylǵan. Onyń bireýi «Taza álem-Astana» JShS-ne berilgen edi.
«Zamanaýı kólikterdiń qosalqy bólshekteri Eýropadan, Túrkııa men Reseıden ákelingen. Mundaǵy otandyq úlestiń salmaǵy - 35%. Qaldyq tasymaldaıtyn kólikterdiń artyqshylyǵy sol, oǵan qalyńdyǵy 6-8 mm bolatyn HARDOX markaly joǵary sapaly shoıyn paıdalanylǵan. Taǵy bir ereksheligi - konteınerler ózdiginen jýylady. Ol úshin tehnıkaǵa sý toltyrylǵan bak ornalastyrady. Kólik qoqysty túsirgen soń, bos konteıner qaldyqtardan tazartylady. Balamaly tehnogolııany qoldaný arqyly óndiriske jol tartqan kólikter jeti jyldan beri Reseı Federatsııasynda synaqtan ótkizildi jáne jaqsy sapaǵa ıe», - deıdi «Allur Auto Astana» JShS satý bóliminiń bastyǵy Aleksandr Tsoı.
Qoqys tasymaldaıtyn kólik óndirisi jekemenshikterdiń de tapsyrysyn oryndaıdy. Máselen, qalalyq jerdegi keıbir kommýnaldyq sharýashylyqtar arnaıy tehnıkany satyp alýǵa múddeli. Onyń baǵasy 20 mln teńgeden bastalady. Jaqyn arada kólikterdi TMD elderine satýǵa shyǵarý josparlanyp otyr. Aıtpaqshy, ámbebap kólikterdi jeńildetilgen lızıng baǵdarlamasy arqyly da alýǵa ábden bolady.
