Qostanaıda qoqys polıgondarynyń teń jartysy talapqa saı emes
QOSTANAI. QazAqparat - Qostanaıda barlyq deńgeıdegi ákimderdiń qatysýymen ótken keńeste qoqys tastaıtyn jerlerdiń sanyn qysqartý jáne polıgondardaǵy menshik ıeleri jumysy talqylandy, dep habarlaıdy QazAqparat.
Oblystyq energetıka jáne turǵyn úı kommýnaldyq-sharýashylyq basqarmasynyń basshysy Almat Esenbaev habarlaǵandaı, oblysta sheshimin tappaǵan ekologııalyq máseleler az emes. Solardyń biri - eldi mekender aýmaǵynyń lastanýy. Bul máselege kóbine polıgondardaǵy menshik ıeleriniń salǵyrttyǵy sebep bolady. Olar ekologııalyq is-sharalardy tolyǵymen oryndamaıdy.
«2019 jylǵy 1 qańtardaǵy jaǵdaı boıynsha qalalar men aýdandardaǵy 294 qoqys polıgonynyń tek 109-y ǵana sanıtarlyq norma talaptaryna sáıkes keldi. Bul rette sanıtarlyq normalarǵa sáıkes kelmeıtin 185 qoqys polıgonynyń 132-si - jeke menshikte, 53-i - kommýnaldyq menshikte. Taǵy bir aıta keterligi, aımaqta qatty turmystyq qaldyqtardy saqtaý jáne qaıta óńdeýmen aınalysatyn kásiporyn joq. Qaldyqtar qala syrtyndaǵy polıgondarǵa jóneltiledi.
«Jyl saıyn ruqsat etilmegen jerlerge qoqys tastaý faktileri kezdesip otyrady. Ekologııalyq departament Qostanaı oblysy aýmaǵynda vırtýaldy geoportal ashty. Sol arqyly ruqsat etilmegen jerlerge qaldyq tastaǵandardy anyqtaýǵa bolady. Geoportal veb-servısterdiń kómegimen geografııalyq aqparatqa qol jetkizýge múmkindik beredi», - dedi A.Esenbaev.
Oblysta qoqys shyǵaratyn polıgondardy qysqartý jumystary osy jyldyń sońyna deıin júrgiziledi.
