Qostanaıda qoqys polıgondarynyń salynýyna jol bergen 26 aýyl ákimi jaýapqa tartyldy
QOSTANAI. QazAqparat – Qostanaı oblysynda 313 zańsyz qoqys polıgony anyqtaldy. Bul týraly Óńirlik kommýnıkatsııalar qyzmeti alańynda Qostanaı oblysy boıynsha Ekologııa departamenti basshysynyń mindetin atqarýshy Talǵat Sabıev málim etti, dep habarlaıdy QazAqparat tilshisi.
2019 jyly departamenttiń ekologııalyq retteý bólimi 197 mekeme-kásiporyndy tekserdi. Qorshaǵan ortaǵa jaǵdaılaryn baqylaý úshin arnaıy saraptamalyq komıssııa quryldy.
«Departamenttiń ekologııalyq ınspektsııasy 2019 jyly 239 zań buzýshylyqty anyqtady. 2,2 mln teńge kóleminde 33 aıyppul salyndy. 4,4 mlrd teńge somasynda zalaldy óteý boıynsha 66 buıryq shyǵaryldy. Buıryqty oryndaý úshin de birshama jumys atqaryldy. Byltyr Qostanaı oblysyndaǵy «Ǵarysh Sapary» UK AQ jerseriktik júıesi arqyly qoqys qaldyqtaryn ruqsatsyz ornalastyrǵan 313 ýchaske anyqtaldy. Qazirgi ýaqytta onyń 155 alqaby joıyldy», - dedi Talǵat Sabıev.
Zańsyz qoqys polıgondardyń paıda bolýyna jol bergen Qostanaı jáne Rýdnyı qalasy ákimdiginiń turǵyn úı-kommýnaldyq sharýashylyq bólimderi, sondaı-aq 26 aýyldyq okrýgtiń ákimderi ákimshilik jaýapkershilikke tartylǵan.
