Qostanaıda qoqys tasıtyn kólik jaıaý júrginshini qaǵyp óltirdi: sot úkimi shyqty

ASTANA. KAZINFORM — Qostanaıda qoqys tasıtyn kólikpen bolǵan apatta adam qaza tapty.

Qostanaı qalasynyń № 2 soty jol qozǵalysy erejesin buzyp, abaısyzda adam ólimine ákelgen júrgizýshige qatysty isti qarady.

Sotta anyqtalǵandaı, 2025 jyldyń qazan aıynda júrgizýshi V. «Tazalyq-2012» JShS-ne tıesili qoqys tasıtyn KamAZ júk kóligin basqarǵan. Ol turǵyn úı aýlasynda artqa qaraı júrip kele jatyp, aınalasyn tolyq baqylamaı, sol baǵytta kele jatqan jaıaý júrginshini qaǵyp ketken.

Jol apaty saldarynan jaıaý júrginshi aýyr jaraqat alyp, oqıǵa ornynda qaza tapqan.

Prokýror júrgizýshini 2 jyl 6 aıǵa bas bostandyǵynan aıyryp, 5 jylǵa kólik júrgizý quqyǵynan shettetýdi surady. Jábirlenýshi tarap kerisinshe, bas bostandyǵynan aıyrýsyz jaza taǵaıyndaýdy ótindi. Sottalýshy óz kinásin tolyq moıyndap, ókinish bildirdi.

— Sot júrgizýshiniń kámeletke tolmaǵan balasy baryn, jábirlenýshilerge keltirilgen zııandy óz erkimen ótegenin, shyn júrekten ókingenin eskerdi. Aýyrlatatyn mán-jaılar anyqtalmaǵan. Nátıjesinde sot V.-ny 2 jylǵa bas bostandyǵynan aıyryp, jazany eń tómengi qaýipsizdik mekemesinde óteýdi jáne 3 jylǵa kólik júrgizý quqyǵynan aıyrýdy sheshti, — delingen habarlamada.

Aıta keteıik, úkim ázirge zańdy kúshine engen joq.

Budan buryn turǵyn úıge zańsyz kirip, adam óltirgen qaskóı sottalǵanyn jazǵanbyz.