Qostanaıda qoqys polıgonyna órtke baılanysty aıyppul salyndy

QOSTANAI. KAZINFORM - Qostanaıdaǵy turmystyq qaldyqtar polıgonyn basqaratyn JShS eki márte ákimshilik jaýapkershilikke tartylyp, oǵan 340 myń teńgeden astam aıyppul salyndy, dep habarlaıdy Kazinform tilshisi.

Qostanaıdyń soltústik ónerkásip aýmaǵyndaǵy «Tazalyq -2012» JShS-na qarasty qatty turmystyq qaldyqtar polıgony qalanyń eń ózekti ekologııalyq jáne órt qaýipsizdigine qatysty problemalarynyń birine aınalyp otyr. 2025 jyldyń 22 sáýirinen bastap, onda birneshe márte órt shyqqan bolatyn. Sonyń saldarynan aýaǵa qoıý tútin tarap, turǵyndardyń narazylyǵyn týdyrdy.

Jaǵdaı kúrdelenip, órtti sóndirýge Qostanaı garnızonynyń kúshteri men tehnıkalaryn tartý qajet boldy.

– Quzyrly organdardyń málimetinshe, «Tazalyq – 2012» JShS birneshe ret ákimshilik jaýapkershilikke tartylǵan. QR ÁQBtK 410-baby (órt qaýipsizdigi talaptaryn buzý) boıynsha polıgon aınalasynda mıneraldandyrylǵan jolaq bolmaǵany úshin 49 150 teńge kóleminde aıyppul salynǵan. Sonymen qatar, Qorshaǵan ortany qorǵaý departamenti tarapynan ekologııany lastaǵany úshin kásiporynǵa 294 900 teńge aıyppul belgilengen, – dedi Qostanaı qalasy Tótenshe jaǵdaılar basqarmasynyń bastyǵy Aslan Mahmutov.

Salynǵan aıyppuldarǵa qaramastan, nysandaǵy jaǵdaı sol kúıinde qalyp otyr. Bılik oryndary ekologııalyq jáne órt qaýipsizdigi talaptarynyń saqtalýyn qamtamasyz etý úshin qosymsha sharalar qabyldaýdy qarastyryp jatyr.

Osyǵan deıin Qostanaı oblysynda qaıtarylǵan aktıvterge 279 shaqyrym sý qubyry salynatyny týraly jazdyq.