Qostanaıda qoǵamdyq kólikterge elektrondy bılet engizildi
QOSTANAI. QazAqparat - Qostanaı qalasynyń qoǵamdyq kólikterinde elektrondy bılet júıesi iske qosyldy, dep habarlaıdy QazAqparat.
Qostanaıdyń qoǵamdyq kólikteri jolaqy tóleýdiń elektrondy júıesine kóshedi. Ázirge mundaı qurylǵylar qaladaǵy alty avtobýsqa synaý úshin ornatyldy. Bul pılottyq jobaǵa qatysý úshin №3, 5 jáne 18 baǵdardyń árqaısyndaǵy eki avtobýs tańdaldy.
«Valıdatorlar jol júrý bıletin esepteýge arnalǵan. Kartalar iske qosylyp, oǵan vırtýaldy aqshalar júkteldi. Sol arqyly jolaqy tólenedi. Kún sońynda olar qansha adamnyń minip-túskeni, qansha tólegeni týraly aqparat alady. Sondaı-aq, jolaýshylar deńgeılerge bólinedi, ıaǵnı kimge jolaqynyń tegin, kimniń jeńildigi bary kórsetiledi», - deıdi Qostanaı ákimdiginiń TKSh jolaýshylar kóligi jáne avtomobıl joldary bóliminiń sektor jetekshisi Nuraly Esirgepov.
Pılottyq joba synaqtan ótkizilip bolǵan soń, valıdatorlar Qostanaıdaǵy barlyq qoǵamdyq kólikterge ornatylady. Ázirshe ázirlik jumystary júrgizilip jatyr, onyń ishinde jol júrý bıletiniń dızaıny jasalýda. Belgilisi, olardyń birneshe túri bolady. Atap aıtqanda, balalarǵa arnalǵan bıletter mektepterde taratylady, al jeńildigi bar jandarǵa jolaqy kartasy áleýmettik qamtamasyz etý organdary arqyly beriledi.
Eske salsaq, byltyr Qostanaı qalasynyń ákimi Bazyl Jaqypov turǵyndarǵa esep berý jıynynda qoǵamdyq kólikterge elektrondy bılet engiziletinin aıtqan bolatyn.
