Qostanaıda qoǵamdyq kólikterdiń qozǵalysyna ýaqytsha tyıym salyndy
QOSTANAI.QazAqparat – 27-28 maýsym aralyǵynda Qostanaı oblysynda qoǵamdyq kólikter júrmeıdi, dep habarlaıdy QazAqparat oblys ákimdigi janyndaǵy óńirlik Shtabqa silteme jasap.
Shtab aqparatyna súıensek, aldaǵy eki kúnde Qostanaıda qoǵamdyq kóliktiń, onyń ishinde saıajaı baǵyttarynyń qozǵalysy toqtatylady. Avtobýstar tek 29 maýsymnan bastap júredi.
«Óńirdiń bas sanıtarlyq dárigeriniń qaýlysyn oryndaý maqstatynda Qostanaı qalasynyń perımetrinde mobıldi beketter ornatylady. 9 avtopatrýl qala ishinde reıd júrgizedi. Sondaı-aq 25 polıtseı qoǵamdyq tártipke jaýap beredi. Senbi jáne jeksenbi kúnderi jumys isteıtinder úshin jumys ornynan anyqtama suralady. Polıtsııa osy talaptardyń oryndalýyna baqylaýdy kúsheıtetin bolady. Barlyq aqparatty emhanalar arqyly tekseredi. Zań buzýshylar QR Ákimshilik Kodeksiniń 462 baby boıynsha jaýapqa tartylady», delingen óńirlik Shtabtyń aqparatynda.
Aıta keteıik, ınfektsııanyń aldyn-alý úshin 27-28 maýsymda Qostanaı, Rýdnyı, Jitiqara, Lısakov, Arqalyq, Tobyl qalalarynda lokdaýn rejımi engizildi. Lokdaýn rejımi engizilgen qala turǵyndaryna úıden jumys úshin, em alýǵa, dári-dármek, azyq-túlik, qoqys tógýge, jeke kólikpen saıajaıǵa barýǵa ǵana ruqsat etiledi. Oıyn-saýyq jáne saýda nysandary, bazarlar, saıabaqtar jabylyp, qoǵamdyq kólikter toqtaıdy.
