Qostanaıda kisi ólimine ushyratqan jol apatyna qatysy bar polıtseı qamaýǵa alyndy
ASTANA. QazAqparat - Leonıd Beda men Baımaǵambetov kóshesindegi kisi ólimine sebep bolǵan jol-kólik oqıǵasyna baılanysty Qostanaı oblysynyń ІІD túsinik berdi, dep habarlaıdy «QazAqparat» HAA tilshisi.
Eske sala ketsek, oqıǵa 30 shilde kúni tańerteńgi saǵat 06:00 shamasynda bolǵan. Oblystyq ІІD baspasóz qyzmeti «Lada Prıora» men «Lada Granta» avtokólikteri soqtyǵysyp, saldarynan sońǵy avtokóliktegi 51 jastaǵy er adamnyń kóz jumǵanyn habarlaǵan bolatyn.
««Lada Prıora» avtokóliginiń rýlinde Qostanaı qalasy ІІB-nyń 22 jastaǵy qyzmetkeri otyrǵan. Jol-kólik oqıǵasy barysynda ol qyzmet babynan tys bolǵan», - dep habarlaıdy Qostanaı oblysynyń ІІD baspasóz qyzmeti.
Jol-kólik oqıǵasy boıynsha QR QK 345-baby 3-bóligine sáıkes (jol erejesiniń buzylýy saldarynan abaısyzda kisi ólimine ákep soǵý) sotqa deıingi tergeý amaldary júrgizilip jatyr.
«Qazaqstan Respýblıkasynyń qoldanystaǵy zańnamasyna sáıkes, bul is asa aýyr emes quqyqbuzýshylyqqa jatady. Onyń turaqty mekenjaıy bar, buryn sotty bolmaǵan, kim ekeni belgili jáne oqıǵa ornynan iz sýytyp ketken joq. Medıtsınalyq tekserý kezinde onyń saý bolǵany anyqtaldy», - dep habarlaıdy vedomstvodan.
Mundaı jaǵdaıda kináliler tutqyndalmaıdy. Oǵan basqa sharalar qoldanylady.
«Alaıda jol-kólik oqıǵasynyń quqyqty qorǵaý jáne zań talaptaryn saqtaýdy talap etý mindettelgen quqyq qorǵaý organy qyzmetkeriniń qatysýymen oryn alǵanyn eskerildi. Qazirgi ýaqytta «Lada Prıora» avtokóliginiń ıesi ýaqytsha ustaý oqshaýlaǵyshyna qamaldy», - delingen habarlamada.
