Qostanaıda kıeli nysandardyń Jol kartasy ázirlendi
QOSTANAI. QazAqparat - Qostanaı oblysynyń mádenıet mekemeleri «Rýhanı qazyna» kishi baǵdarlamasyn iske asyrý aıasynda jetpis joba júzege asyrdy. Onyń on besi - oblystyq kishi joba jáne el besi - óńirlik is-shara, dep habarlaıdy QazAqparat.
Oblystyq mádenıet basqarmasy Erlan Qalmaqovtyń aıtýynsha, búginde iske asyrylǵan jobalardyń nátıjelerin, olardyń tıimdiligi men jergilikti qoǵamdastyqtyń suranysyn eskere otyryp, óńirler 2019 jylǵa arnalǵan 130-dan astam is-shara tizimin ázirledi. Qarjylandyrý somasy 30 mln teńgeden asady. Aýqymdy is-sharalar Denısov, Qostanaı, Naýyrzym, Sarykól, Taran aýdandarynda jáne Lısakov qalasynda josparlanǵan.
«Byltyr Qostanaı aýdanynda «Qymyzmuryndyq» festıvali, Sarykól aýdanynda «Uly dala» Oren Air festıvali, Amangeldi aýdanynda jáne Lısakov qalasynda respýblıkalyq aqyndar aıtysy, Jankeldın aýdanynda «Torǵaı áýenderi», «Babalar sazy» án baıqaýlary, Qamysty aýdanynda «Ánim saǵan, týǵan jer!» folklorlyq ánder baıqaýy ótti. 2018 jyly aýyldyq kitaphanalardy, mádenıet jáne demalys ortalyqtaryn jańǵyrtý aıasynda Áýlıekól, Qarasý, Qostanaı aýdandarynda 3 kovorkıng-ortalyq ashyldy. Osy jyly oblystyq ámbebap ǵylymı kitaphanasynda «Bilim Ortalygy» jobasynyń tusaýkeseri uıymdastyryldy», - dedi basqarma basshysy.
Óńirde «Qazaqstannyń kıeli jerleriniń geografııasy» arnaıy jobasy aıasynda tarıhı-mádenı nysandardy, jalpyǵa zııarat etý oryndaryn, kıeli nysandardy zertteý men nasıhattaý, olardyń aqparattyq súıemeldeýi boıynsha jumys jalǵasýda.
«Jańadan anyqtalǵan oblystyń kıeli jerleriniń tizimin qalyptastyrý boıynsha jumys tobynyń otyrysynda qaralǵan 25 nysan boıynsha zertteý, qosymsha ańyzdardy, muraǵattyq kózderdi jınaqtaý júrgizilip otyr. Sonymen qatar, oblystyń kıeli nysandaryn odan ári nasıhattaý maqsatynda mádenıet basqarmasy 2019 jyly jalpyulttyq mańyzy bar Qostanaı oblysynyń kıeli nysandaryna barý boıynsha vırtýaldy ekskýrsııany ázirleýdi josparlap otyr», - dedi ol.
Qalalar jáne aýdandar ákimdikteri kıeli nysandardyń ınfraqurylymyn jasaý men oǵan qoljetimdilikti qamtamasyz etý boıynsha 2019-2020 jyldarǵa arnalǵan Jol kartasyn ázirledi.
