Qostanaıda qazaqtyń tuńǵysh mehanızator qyzyna eskertkish ornatyldy
QOSTANAI. QazAqparat - Qostanaıda dańqty mehanızator, Sotsıalıstik Eńbek Eri Kámshat Dónenbaevaǵa arnalǵan eskertkish ornatyldy, dep habarlaıdy QazAqparat.
Ataqty traktorshynyń eskertkishi óziniń esimi berilgen K.Dónenbaeva kóshesindegi jańadan salynǵan Jastar saraıynyń janynan boı kóterdi. Ashylý saltanatyna qatysqan oblys ákimi Arhımed Muhambetov Kámshat Dónenbaevanyń esimi árdaıym jadymyzda bolyp, oǵan kórsetiler qurmet taýsylmaıtynyn jetkizdi.
«Qazaqtyń mańdaıyna bitken birtýar qyzy Kámshat Dónenbaeva bir dáýirdiń ańyzyna aınaldy. Ol nebári 32 jasynda «Sotsıalıstik Eńbek Eri» ataǵyn aldy. Kámshat apamyz traktoryn tizgindep qana qoımaı, oshaǵyn óshirgen joq. 4 balany tárbıelep ósirdi. Ómiriniń sońyna deıin basynan aq oramalyn tastaǵan joq. Qandaı jıynda bolsyn, elimizdiń amandyǵyn tilep otyratyn. Ókinishke qaraı, halyqtyń aıaýly qyzynan aıyrylyp qaldyq. Degenmen, Kámshat apamyzdyń esimin qurmetteýge arnalǵan sharalar jalǵasa beredi», - dedi oblys basshysy.
Sonymen qatar, Qazaqstannyń Eńbek Eri Saıran Buqanov dańqty mehanızatordy bir oblystyń emes, kúlli Qazaqstannyń maqtanyshy dep baǵalady.
«Sonaý 1984 jyly shóp shaýyp kelý úshin 500 shaqyrymdaǵy Túmen oblysyna baratyn boldyq. Ózimizde qýańshylyq basqan. Maldy qutqarý kerek. Kámat apamyz «Kırovets» mindi. Bizdiń: «Siz ne úshin barasyz. Elde qalyńyz», - degenimizdi tyńdamady. Traktoryna otyryp alyp, shalǵaıǵa tartyp otyrdy. Reseıde bir aı shóp basynda jumys istedi. Keıin, 90-shy jyldardyń sońynda oǵan aýyldyq keńes tóraǵasy, ınjener jumysyn usyndy, biraq ol bas tartty. Apamyz árýaqytta qarapaıymdylyǵyn saqtady. Óz atyn tarıhqa altyn áriptermen jazdy. Ol bizdiń jastarymyz úshin úlgi. Onyń zamandastaryn tańǵaldyrǵan eńbekqorlyǵy búgingi urpaqqa jetýi tıis», - dedi S.Buqanov.
Eskertkishti oblys ákimi Arhımed Muhambetov pen oblystyq ardagerler keńesiniń tóraǵasy Kenjebek Ýkın ashty.
Aıta keteıik, Kámshat Dónenbaeva 1943 jyly Qostanaı oblysy Uzynkól aýdany Lenın sovhozynda týǵan. Eńbek jolyn Uzynkól elevatorynda bastady. 1961 jyldan Qostanaı oblysy Borovskıı aýdany «Harkovskıı» sovhozynda mehanızator bolyp eńbek etken. Osy oblystyń Meńdiqara aýdanyndaǵy «Kamensk-Ýralskıı» keńsharynda mehanızatorlar daıyndaıtyn kýrsty, keıin Qostanaı aýyl sharýashylyq tehnıkýmyn syrttaı oqydy. «Ardagerler uıymy» respýblıkalyq qoǵamdyq birlestigi Ortalyq Keńesiniń múshesi, Oblystyq áıelder isi jónindegi jáne otbasy-demografııalyq komıssııanyń quramynda birneshe qyzmetterdi atqardy. 1980-1985 jyldary KSRO Joǵaryǵy Keńesiniń Ulttar Keńesi tóraǵasynyń orynbasary boldy. 1976 jyly KSRO Memlekettik syılyǵynyń laýreaty. Eki ret Lenın ordenimen, Qurmet belgisi ordenimen marapattalǵan. 1990-1993 jyldary osy keńsharda qaýipsizdik tehnıkasynyń ınjeneri, 1993 jyldan sharýa qojalyǵyn basqardy. Qostanaı oblysynyń jáne Qostanaı qalasynyń qurmetti azamaty.
