Qostanaıda Qazaqstannyń qalyptasýyndaǵy Elbasynyń róli talqylandy
Shara L.Tolstoı atyndaǵy oblystyq kitaphanasynda «Sarapshy» saıası klýbynyń birinshi otyrysy aıasynda uıymdastyryldy. Oblystyq ishki saıasat basqarmasy basshysy Záýre Baımenovanyń aıtýynsha, saıası klýb qurýdaǵy maqsat - saıası partııalardy, azamattyq qoǵamdy, BAQ pen ÚEU-dy biriktirý.
Osy kezdesýge oblystaǵy saıası partııalardyń basshylary, azamattyq qoǵam, zııaly qaýym, mádenıet jáne bilim salasynyń qyzmetkerleri qatysty.
Záýre Baımenova Tuńǵysh Prezıdenttiń saıası jetistikteri men ustanǵan saıasaty elde qaqtyǵystardyń bolmaýyna, jalpyulttyq kelisim men birliktiń pármendi modelin qurýǵa múmkindik bergenin sóz etti.
«Azamattyq qoǵam ókilderin turaqty seriktes retinde qarastyra otyryp, memlekettik saıasatty, áleýmettik mańyzdy jobalardy júzege asyrý maqsatynda «Sarapshy» saıası klýbynyń ashylýyna bastamashy boldyq. Josparǵa saı kezdesýler toqsan saıyn ótetin bolady. Kezdesýlerde saıası partııalardyń jumysymen tanysyp, ózekti máselelerdi talqylap, olardyń sheshimin tabýǵa múmkindik beriledi. Alǵashqy kezdesýimiz QR Tuńǵysh Prezıdenti N.Nazarbaevtyń Qazaqstannyń qalyptasýy men damýyndaǵy róli aıqyndaý bolyp otyr. Tarıhtyń jańa taraýyn bastaǵan egemen elimiz taǵy bir mańyzdy kezeńniń aldynda tur. Osy kezeńde qabyldanatyn sheshimder men keleshekte júrgiziletin saıası baǵytty saqtap qalýy tıis. Qıyn-qystaý zamanda memleketti nyq turǵyzǵan Elbasynyń eńbegi ushan-teńiz», - dedi basqarma basshysy.
Jıynda esimderi elge belgili sarapshylar sóz aldy. Máselen, qoǵam qaıratkeri Rımma Ǵaısenova aıtqandaı, Qazaqstan otyz jyl ishinde adam sengisiz nátıjelerge qol jetkizdi.
«Táýelsiz Qazaqstannyń damýynda Nursultan Ábishulynyń eńbegi ólsheýsiz. Muny egemendiktiń birinshi kúninen-aq baıqaýǵa bolady. Elbasy áýeli shekarany shegendedi. Odan ári ıadrolyq qarýdan bas tartty. Semeı polıgonyn japty. Búkilálemdik kórme uıymdastyrdy. Mine, osyndaı salıqaly saıasatynyń arqasynda qazaqstandy álemge tanytyp, aıanbaı eńbek etti. Elimizdiń saıası-ekonomıkalyq damýyna jan-jaqty qoldaý kórsete bildi»,- dedi Rımma Ǵaısenova.
Sarapshylar aldaǵy saıası ózgeristerdiń mańyzdylyǵyna toqtaldy. Aıtýlarynsha, Elbasynyń saıasatyn odan ári iske asyrý maqsatynda kezdesýler jıi uıymdastyrylǵany durys.
