Qostanaıda Qazaqstandaǵy eń iri jabyq akvapark ashyldy
QOSTANAI. KAZINFORM — Eki qabatty keshenniń jalpy aýmaǵy 9 myń sharshy metrden asady. Nysan bir mezette 500-ge jýyq kelýshini qabyldaı alady, dep habarlaıdy oblys ákimdiginiń baspasóz qyzmeti.
Qostanaıda Qazaqstandaǵy eń iri jabyq akvaparktiń tehnıkalyq iske qosylýy ótti. Jańa nysan óńirde qalyptasyp kele jatqan týrıstik ınfraqurylymnyń mańyzdy bóligine aınalyp, ishki týrızmniń damýyna jańa serpin beredi dep kútiledi.
Nysannyń ashylý rásimine Qostanaı oblysynyń ákimi Qumar Aqsaqalov qatysty. Onyń aıtýynsha, jańa nysan zamanaýı qalalyq ortanyń bir bóligine aınalyp, óńir turǵyndarynyń sapaly demalýyna jańa múmkindikter ashady.
— Memleket basshysy qolaıly qalalyq ortany qalyptastyrýǵa, zamanaýı ınfraqurylymdy damytýǵa jáne azamattardyń sapaly demalysyn qamtamasyz etýge únemi erekshe kóńil bólip keledi. Bizdiń mindetimiz — balalar men jastardan bastap aǵa býyn ókilderine deıingi turǵyndardyń óńirden tys jerge shyqpaı-aq bos ýaqytyn sapaly ótkizýine jaǵdaı jasaý, — dedi Qumar Aqsaqalov.
Eki qabatty keshenniń jalpy aýmaǵy 9 myń sharshy metrden asady. Nysan bir mezette 500-ge jýyq kelýshini qabyldaı alady. Qysy uzaq óńir úshin akvaparktiń jyl boıy jumys isteıtini erekshe mańyzdy. Kelýshiler úshin akvapark 2026 jyldyń qyrkúıek aıynan bastap jumysyn bastaıdy.
Keshenniń ortalyq bóliginde jalpy aýmaǵy shamamen 1,5 myń sharshy metrdi quraıtyn jeti basseın ornalasqan sý aımaǵy bar. Munda jasandy tolqyndary bar basseın, balalarǵa arnalǵan aımaq, «Akvatonık» jáne túrli sý attraktsıondary qarastyrylǵan.
«Osmınog» otbasylyq demalys orny ǵana emes, Qostanaıǵa elimizdiń túkpir-túkpirinen jáne jaqyn shetelden qonaqtardy tartatyn jańa qalalyq kórikti orynǵa aınalady. Nysan oblys ortalyǵynyń týrıstik áleýetin arttyratyn erekshe nysandardyń biri bolmaq.
Qostanaıda týrıstik ınfraqurylymdy damytýmen qatar, zamanaýı ári jaıly qalalyq orta da júıeli túrde qalyptasyp keledi. Qalanyń jańa tartylys núkteleriniń qatarynda trıatlon parki, ortalyq skver jáne A.Baıtursynuly atyndaǵy ýnıversıtet aýmaǵyndaǵy saıabaq bar. Sonymen qatar saıabaqtar men skverler abattandyrylyp, jańa alleıalar, serýendeý, sporttyq jáne demalys aımaqtary qurylyp jatyr.
Qostanaıda zamanaýı qonaqúı ınfraqurylymy da qarqyndy damyp keledi. Qalada halyqaralyq Marriott, Novotel jáne Holiday Inn brendteriniń qonaqúı keshenderi salynady. Óńir basshysynyń aıtýynsha, iskerlik belsendiliktiń artýy jáne jańa ınvestorlardyń kelýi zamanaýı ornalastyrý oryndaryna degen suranysty arttyryp otyr. Mundaı jobalar turǵyndar men qonaqtar úshin demalys, qarym-qatynas jáne bos ýaqytty tıimdi ótkizý múmkindikterin keńeıtip, óńirde ómir súrýge jáne jumys isteýge qolaıly orta qalyptastyrýǵa yqpal etedi.
— Ekonomıkany damytý, jańa fabrıkalar men zaýyttardy iske qosýmen qatar, adamdardyń jaıly ómir súrýine jáne mazmundy otbasylyq demalysyna jaǵdaı jasaý qajet. Qostanaı oblysynda turǵyndarǵa da, óńir qonaqtaryna da qyzyqty bolatyn biregeı nysandar kóp bolýy kerek. Osyndaı oryndardyń biri elimizdegi eń iri jabyq akvapark bolady, — dep atap ótti oblys ákimi.
Bul turǵyda «Osmınogtyń» ashylýy bir ǵana nysannyń iske qosylýymen shektelmeıdi. Akvapark Qostanaı oblysynyń týrıstik usynysyn tolyqtyryp, óńirge kelýge jańa sebep qalyptastyrady. Sonymen qatar oblys ortalyǵynyń elimizdiń ár óńirinen týrısterdi tartatyn mańyzdy ortalyq retindegi rólin kúsheıtedi.
Buǵan deıin Pavlodarda akvapark qurylysyna baılanysty qalalyq baqtyń aýmaǵy qysqaryp qalǵany belgili boldy.
