Qostanaıda Qazaq handyǵynyń 550 jyldyǵyna arnalǵan eskertkish qulatyldy
QOSTANAI. QazAqparat - Qarabalyq aýdanynda 2015 jyly Qazaq handyǵynyń 550 jyldyǵyna arnalyp ornatylǵan eskertkish qulatyldy, dep habarlaıdy «QazAqparat» HAA tilshisi.
Qostanaı oblysy Qarabalyq aýdanynda Qazaq handyǵynyń 550 jyldyǵyna arnalyp ornatylǵan eskertkish qıratyldy. Mundaı keleńsiz kórinisti Erjigit Oralbekov esimdi Feısbýk jelisiniń qoldanýshysy óz paraqshasynda bólisken edi.
Áleýmettik jelide daý týdyrǵan jaǵdaıǵa baılanysty jergilikti atqarýshy bılik ókilderiniń jaýap berýin suradyq.
«Osy jyldyń kóktem aıynda eskertkish úgitile bastady. Óıtkeni ol taza tsementten ǵana salynǵan. Jergilikti turǵyndarmen aqyldasa kele, qulaıyn dep turǵan arhıtektýralyq formany aýystyrý nemese jóndeý máselesin talqyladyq. Sebebi, eskertkish kez kelgen ýaqytta qulaýy múmkin edi. Jaqynda munyń ornyna basqa eskertkish ornatýdy uıǵardyq. Jańa nysan taza qoladan jasalady jáne burynǵy eskertkishten 50-70 santımetrge bıik bolady. Ol úshin Almaty qalasyna tapsyrys berildi. Qazan aıynyń alǵashqy onkúndiginde ákelinedi. Jańa eskertkishke Qarabalyq batyrdyń esimi beriledi , - dedi Qarabalyq aýylynyń ákimi Asan Shektibaev agenttik tilshisine bergen jaýabynda.
Aýyl ákiminiń sózinshe, jańa eskertkishtiń mańaıyn abattandyrýǵa baılanysty konkýrstyq sharalar ótkizilip jatyr. Jańa nysandy resmı bekitý úshin qajetti qujattar mınıstrlikke usynyldy. Aıta keteıik, sáýlet kompozıtsııasy jeke kásipkerlerdiń qarajatyna salynady.
