Qostanaıda «Qazaq halqyna alǵys» monýmenti turǵyzylady
Mundaı usynys oblys ákimi Arhımed Muhambetovke Naýryz merekesine arnalǵan kontserttik baǵdarlama barysynda aıtyldy.
"Qostanaıdaǵy túrli ult ókilderi qaýymdastyǵy birigip, qazaq halqyna alǵys aıtý maqsatynda monýment ashqymyz keledi. Jańa nysandy "Qazaq halqyna alǵys" dep ataýǵa da bolady. Osy bastamany sizben aqyldasyp, qurylys jumystaryn bastasaq degen jospar bar", - dedi "Erebýnı" armıan qaýymdastyǵynyń tóraǵasy Tıgran Badalıan.
Óz kezeginde oblys basshysy bul usynysty qoldaıtynyn jetkizdi.
"Bastamalaryńyz jaqsy. Men qoldaımyn. Qazaq halqyna alǵys aıtýǵa arnalǵan monýment kórneki orynǵa aınalýy tıis. Sondaı-aq, qala turǵyndary men qonaqtary jyl saıyn 1 naýryz ben 1 mamyrda osyndaı qundy eskertkishtiń janyna jınalyp, merekeni atap ótýi qajet. Jańa nysannyń ornalasatyn jerin anyqtaýdy qala ákimi Bazyl Jaqypovqa tapsyramyn", - dedi Arhımed Muhambetov.
Aıta keteıik, merekege oraı búgin Qostanaıdaǵy "Arǵymaq" ıppodromynda respýblıkalyq at jarysy uıymdastyrylady.
