Qostanaıda qatty jel ǵımarattyń shatyryn ushyryp ketti
QOSTANAI. QazAqparat - Qatty jel Qostanaı obylysy Uzynkól aýdandyq bilim berý bólimi ǵımaratynyń shatyry ushyp ketti, dep habarlaıdy QazAqparat oblystyq TJD baspasóz qyzmetine silteme jasap.
«Sekýndyna 20 metr jyldamdyqpen soqqan jel Uzynkól aýdanyndaǵy bilim berý mekemesi shatyryn qıratyp ketti. Eki qabatty ǵımarattyń 323 sharshy metr bolatyn temir jabyndysy jerge qulap tústi. Nysannyń jalpy aýmaǵy - 1 599 sharshy metr. Tabıǵı apat bilim berý mekemesiniń jumysyna keri áserin tıgizgen joq», - dedi oblystyq TJD-niń baspasóz hatshysy Ýálıhan Dosanov.
Belgili bolǵandaı, ǵımarattan ushqan shatyr Daewoo Matiz markaly avtokóliginiń ústine túsken. Oqys oqıǵa ornynda arnaıy komıssııa jumys istep jatyr.
