Qostanaıda kásiporyn sheneýniktermen sybaılasyp, 3 mlrd teńge sýbsıdııany jymqyrǵan

QOSTANAI. KAZINFORM — Qarjy monıtorıngi agenttigi Qostanaı oblysynda BEEF EXPORT GROUP JShS et óńdeý kásiporny dırektorynyń basshylyǵy uıymdastyrǵan qylmystyq topqa qatysty tergeýdi aıaqtady.   

Atalǵan adamdar uzaq ýaqyt boıy QR agroónerkásip keshenin damytý ulttyq jobasy sheńberinde memleket sýbsıdııa retinde bólgen bıýdjet qarajatyn urlaýmen aınalysyp, memleketke 3 mlrd teńgeden astam shyǵyn keltirgen.

Tergeý barysynda kúdiktilerden 107 mln teńge ótelip, 3,1 mlrd teńge múlkine tyıym salyndy.

Qylmystyq shemaǵa 49 adam tartylǵan, onyń 13 — uıymdasqan toptyń músheleri.

Olarǵa sýbsıdııa jymqyrý, salyq tóleýden jaltarý, zańsyz kásipkerlik qyzmet, qylmystyq jolmen alynǵan múlikti zańdastyrý, laýazymdy tulǵalarǵa para berý jáne qujattardy qoldan jasaý sekildi birneshe aıyp taǵylǵan. 

Uıymdasqan toptyń basshysy óz baqylaýyndaǵy kompanııanyń qyzmetine salyqtyq tekserý júrgizgen memlekettik qyzmetshige zorlyq-zombylyq jasady dep kúdikke ilinip otyr. 

Sondaı-aq, Qostanaı, Aqtóbe, Soltústik Qazaqstan, Pavlodar jáne Batys Qazaqstan oblystarynyń 30 sharýa qojalyqtyń basshylary men ókilderi is boıynsha kúdikti dep tanyldy.

Budan basqa, sotqa deıingi tergeý sheńberinde Qostanaı oblysy ákimdiginiń aýyl sharýashylyǵy basqarmasynyń 3 laýazymdy tulǵasyna aqsha urlaýǵa jáne para alýǵa járdemdesti degen aıyp taǵyldy. 

7 veterınar dárigerge qujattardy qoldan jasaǵany, aqparattyq júıege kórineý jalǵan aqparat engizgeni, sondaı-aq zańsyz syıaqylar alǵany úshin aıyp taǵyldy.

Qazirgi ýaqytta taraptar qylmystyq is materıaldarymen tanysyp jatyr.