Qostanaıda kásiporyn dırektory tenderde kásipker áıeline qoldaý kórsetken
QOSTANAI. QazAqparat - Qostanaılyq memlekettik qyzmetshi memlekettik satyp alýlar kezinde óziniń áıeline zańsyz qoldaý kórsetken, dep habarlaıdy QazAqparat QR Memlekettik qyzmet isteri jáne syıbaılas jemqorlyqqa qarsy is-qımyl agenttiginiń oblystyq departamentine silteme jasap.
Departament mamandary memlekettik satyp alýdaǵy shekteýlerdiń oryndalýyna qatysty únemi tekseris júrgizip otyrady. Sondaı tekserýlerdiń birinde Áýlıekól aýdany ákimdiginiń TKSh, jolaýshylar tasymaly jáne kólik joldary bólimine tıesili «Mereı» MQK basshysy V.Lyfardyń tártip buzǵany anyqtaldy.
«Belgili bolǵandaı, «Mereı» MQK dırektory A.V Lyfar óziniń áıeli basqaratyn «Áýlıekól-Servıs» JShS-na memlekettik satyp alýlar kezinde zańsyz qoldaý kórsetken. Ol 2017 jyldyń shilde aıynan 2018 jyldyń mamyr aıyna deıin 7 302 872,74 teńge bolatyn 11 memlekettiń satyp alý boıynsha kelisimshart jasaǵan. Onyń ishinde 8 kelisimshart tehnıkalardyń qosalqy bólshekteri nemese olardy jóndeýge baılanysty iske asqan. Biraq, «Áýlıekól-Servıs» JShS-nyń negizgi jumys baǵyty qaldyq zattardy óńdeý men joıý bolǵany anyqtaldy», - delingen vedomstvonyń habarlamasynda.
Osylaısha, «Mereı» MQK dırektory A.Lyfar «Sybaılas jemqorlyqqa qarsy is-qımyl týraly» zańyn buzyp otyr.
Syıbaılas jemqorlyqqa qarsy departament hatynyń negizinde Іshki memlekettik aýdıt departamenti «Mereı» MQK dırektory A.Lyfardy ákimshilik jaýapkershilikke tartty. Oǵan 50 aılyq eseptik kórsetkish (120 250 teńge ) kóleminde aıyppul salyndy.
Sonymen qatar oǵan qatań sógis berildi.
