Qostanaıda kásipkerlerdi qoldaý úshin 1 mlrd teńge bólindi
QOSTANAI.QazAqparat - Qostanaıda shaǵyn jáne orta bıznesti damytýǵa arnalǵan keshendi baǵdarlamalar jumysyn bastady, dep habarlaıdy QazAqparat.
Qostanaı oblysynyń ákimi Arhımed Muhambetov turǵyndarǵa esep berý kezdesýinde shaǵyn jáne orta kásipkerlikti damytý baǵdarlamalarynyń oryndalýy barysymen tanystyrdy. Jalpy, óńirde shamamen 51,1 myń shaǵyn jáne orta kásipkerlik sýbektisi jumys isteıdi. 2018 jyldyń qańtar-qyrkúıek aılarynda olar shyǵarǵan ónim 584,9 mlrd teńgeni qurady, ósimi - 17,4%. Shaǵyn jáne orta bıznesti qoldaý negizinen «Bıznestiń jol kartasy 2020» biryńǵaı bıznesti qoldaý men damytý baǵdarlamasy aıasynda júzege asyrylady. Osy baǵdarlama arqyly byltyr 2,1 mlrd teńge ıgerildi.
Bıylǵy jyldyń basty jańalyǵy - Qostanaı oblysynda otandyq taýar óndirýshileriniń katalogy jasaldy. Munda shaǵyn jáne orta kásibin ashqan jastardan bastap, tájirıbeli kásipkerlerdiń ónimderi qamtylǵan.
Prezıdenttiń tórtinshi áleýmettik bastamasyn iske asyrý sheńberinde aýyldardaǵy sııaqty qalalarda da shaǵyn jáne orta bızneske shaǵyn nesıe berý múmkindikterin keńeıtýge arnalǵan «Eńbek» memlekettik baǵdarlamasynyń ekinshi baǵyty iske asyrylýda. Qalalarda mıkrokredıt berýge 1,2 mlrd teńge baǵyttaldy, onyń 0,5 mlrd teńgesi - Prezıdenttiń bes bastamasy aıasynda.
«2016 jyldan bastap oblysta kásipkerlerdi óńirlik qarjylandyrýdyń «Qos Qoldaý» baǵdarlamasy jumys isteýde. Atalǵan baǵdarlama boıynsha eki jyl ishinde 1,3 mlrd teńgeniń 53 kredıti berildi, onyń ishinde 2018 jyly qaıta qaralǵan qarjy esebinen 181 mln teńgeniń 7 jobasy maquldandy. Bıyl baǵdarlamany iske asyrý jumysy jalǵasady. Sol sııaqty sharýasyn dóńgeletemin degenderge «AtamekenQostanaı» mıkroqarjy uıymy arqyly nesıe beriledi. Kásippen aınalysý úshin memleket jan-jaqty qoldaý jasap keledi»,- dedi Arhımed Muhambetov.
Jalpy alǵanda, memlekettik jáne óńirlik baǵdarlamalardy iske asyrý kezeńinde oblysta 5 myńnan astam turaqty jumys orny ashyldy. Bıýdjetke shamamen 46 mlrd teńge salyq aýdarymdary tústi. Shaǵyn jáne orta bıznes salasynda tsıfrlandyrý sheńberinde Azııa damý bankiniń grantymen «BIG DATA» jobasy qolǵa alyndy. Atalǵan joba bıznes sýbektileriniń tsıfrlyq derekqory sanalady. Oblys ákiminiń aıtýynsha, týrızm men kásipkerlikti damytý maqsatynda kórikti jerlerdiń kartasy jasaldy. Kıeli oryndardyń mobıldi qosymshasy jáne saıt-portaly iske qosyldy.
