Qostanaıda kásipkerdiń aqshasyn jymqyrǵan buzaqylar ustaldy
QOSTANAI. QazAqparat – Qostanaı qalasy polıtsııa basqarmasy «Soltústik» bólimshesiniń polıtseıleri kásipkerge qaraqshylyq shabýyl jasaǵan kúdiktilerdi eki táýlik ishinde tapty, dep habarlaıdy QazAqparat.
Qylmys 2019 jylǵy 29 jeltoqsanda bolǵan. Keshki 18.30-da Skladskoı kóshesinde betperde kıgen eki buzaqy kásipkerge kózden jas aǵyzatyn ballondy qoldanyp, sómkesindegi aqshany urlap ketken. «Sómke jyrtylyp ketip, 3 mln teńge qarajat jerge shashylyp qalǵan. Alaıda kúdiktiler 2,5 mln teńgeni jymqyryp ketken. Jábirlenýshi aqshasyn «ZIL» kóliginiń ishinde saqtaǵan. Ol betperde kıgen kúdiktelerdi dál sýrettep bere almady. «Soltústik» polıtsııa bóliminde qylmysty ashý úshin jedel tergeý toby qurylyp, ony qylmystyq izdestirý bastyǵy, polıtsııa kapıtany Aıan Shaıahmetov basqardy. Top quramynda jedel qyzmetkerler polıtsııa kapıtany Qazbek Qaıratuly, polıtsııa kapıtany Qýat Temirǵalıev jáne polıtsııa kapıtany Bolat Nurtazın jáne Álibek Keýkenov jumys istedi», - delingen polıtsııanyń aqparatynda. Jedel is-sharalar júrgizý kezinde 32 jáne 33 jastaǵy kúdiktiler Tobyl qalasynda ustaldy. Olar aqshanyń bir bóligimen nesıelerin japqan. Sonymen qatar Jańa jyl merekesine jumsaǵan. Osy derek boıynsha tergeý jumystary júrgizilýde. Buzaqylar ýaqytsha ustaý ızolıatoryna qamaldy.
