Qostanaıda qarjy pıramıdasyn qurǵan 63 jastaǵy áıel sottaldy

QOSTANAI. QazAqparat – Qostanaı qalalyq №2 sotynyń ókimimen qarjy (ınvestıtsııalyq) pıramıdasyn uıymdastyryp, ókilettigin asyra paıdalanǵany úshin Qostanaı oblysynyń turǵyny sottaldy, dep habarlaıdy QazAqparat tilshisi.

Qostanaı oblystyq sotynyń baspasóz qyzmetinen málim etkendeı, 2017-2019 jyldar aralyǵynda azamat K. «Novyı Dom 2017» Tutyný kooperatıviniń basshysy bola otyryp, jeke-dara basshylyq etý jáne TK qarajatyn maqsatty jumsaýdy baqylaý boıynsha ózine barlyq ókilettikterdi bergen.

«Ári qaraı K. «arzan turǵyn úı» alý baǵdarlamalary men olardyń tıimdi tustary jaıly jarnamanyń arqasynda qarjy pıramıdasyn qurady. Ol múliktik paıda alý maqsatynda «Tutyný kooperatıvi týraly» QR Zańynyń talaptaryna baǵynbaı, TK-ge úleskerlerdi óz betimen tańdap otyrǵan. TK-niń jarǵylyq kapıtaly ashylǵan kezde 0 teńge bolǵan. Al onyń qarjylyq bóligi tek zardap shekkenderdiń qarajatynan jınalǵan», - dep habarlady oblystyq sottan.

63 jastaǵy alaıaq 296 adammen úleskerlik týraly jazbasha kelisimshart jasasyp, olardan 264 mıllıonnan asa teńge alǵan. Alaıaq áıeldiń qurbandary ár óńirden bolǵan.

Kúdiktiniń kinásin zardap shekkender men kýágerlerdiń sózderi, qylmystyq istiń zertteý materıaldary rastady.

«Aıyptalýshy qarjy pıramıdasyn uıymdastyrý, ókilettigin asyra paıdalaný boıynsha kináli dep tanylyp, oǵan 6 jyl bas bostandyǵynan aıyrý jazasy taǵaıyndaldy. Ol, sonymen qatar, kommertsııalyq jáne kommertsııalyq emes uıymdarda basqarýshy qyzmetterdi atqara almaıdy. Jazasyn qaýipsizdigi barynsha tómen qylmystyq-atqarý júıesi mekemesinde óteıdi», - delindi sotta.

Úkim zańdy kúshine engen joq.