Qostanaıda qarǵa maltyqqan avtobýstaǵy balalar qutqaryldy
QOSTANAI. QazAqparat - Qostanaıda Ryspaı kentiniń janynda mekteptiń shaǵyn avtobýsynda bolǵan balalardy qar qursaýynan qutqarý operatsııasy jasaldy.
Bul týraly «QazAqparat» HAA tilshisi habarlady.
Kólik Ryspaıdan Talapker kentine bara jatqan joldan shyǵa almaı qalǵan. Balalar úılerine jetkizildi. Avtobýsta 7 bala bolǵan.
Tótenshe oqıǵa jaıly Soltústik óńirlik aeromobıldi jedel qutqarý jasaǵyna habarlama tústi. Qutqarýshylar «TREKOL» markaly jol talǵamaıtyn kólikpen kelip jetti.
Az ǵana ýaqyttyń ishinde olar avtobýsty qardan shyǵaryp, baratyn jerine jetkizdi. Sol kólikpen qutqarýshylar qar basqan jolda jeńil mashınalar júrgizýshileri men jolaýshylarǵa da járdemdesti. Jasaq basshysynyń orynbasary Sergeı Shmıdt habarlaǵandaı, olar Ryspaı, Belozerka, Balyqty kentteri aýmaǵynda qarǵa batyp qalǵan. Barlyǵy 22 adamǵa kómek kórsetildi.
