Qostanaıda karantın rejımin buzǵandarǵa 54 mln teńge aıyppul salyndy
QOSTANAI. QazAqparat – Qostanaı oblysynda karantın sharalaryna qaramastan otbasylyq otyrys jasaıtyndar azaımaı tur. Oblys ákimi janyndaǵy jedel shtab quqyq qorǵaý organdary qyzmetkerlerimen birge reıd sharalaryn kúsheıtti, dep habarlaıdy QazAqparat tilshisi.
Oblysta karantın rejımi jáne sanıtarlyq tártip-talaptyń saqtalýyn 91 monıtorıng toby baqylaıdy. Onyń quramynda qala-aýdan ákimdikteriniń, «Atameken» UKP-nyń mamandary, jergilikti polıtsııa qyzmetkerleri, BAQ ókilderi bar. Monıtorıngtik top músheleri ótken demalys kúnderi arnaıy reıd uıymdastyryp, 436 bıznes nysanǵa tekserý júrgizgen. Nátıjesinde 9 nysannyń karantın rejimin buzǵany anyqtalyp otyr. Máselen, Qostanaı qalasyndaǵy «Ladoga» kafesi jumys rejiminiń shektelýine qaramastan, demalys kúnderi de klıent qabyldaǵan.
«Oblysta karantın tártibi belgilengenine qaramastan toı toılap, otbasylyq otyrys jasaýshylar azaımaı tur. Ásirese aýyldyq mekenderde jıi buzylýda. Máselen, Jangeldın aýdanynyń Shegen aýylynda, kópshilik jıyndarǵa tyıym salynǵanyna qaramastan, as berilgen. Dál osy aýdanǵa qarasty Kókalat aýylynyń turǵyny 30 adamdy qonaq etip, 70 jasqa tolǵan mereıtoıyn atap ótken. Sondaı-aq, Qostanaı aýdanynyń Mıchýrın aýylyndaǵy monshanyń shekteý qoıylǵan ýaqyt ishinde 8 adam qabyldaǵany anyqtalyp otyr. Reıd nátıjesi boıynsha ákimshilik hattamalar toltyryldy», delingen oblystyq polıtsııa departamentiniń málimetinde.
Jalpy 6 qarasha men 7 jeltoqtan aralyǵyndaǵy reıd sharalary barysynda 10 619 nysan tekserilip, 1448 tártip buzýshyǵa jalpy somasy 54 mln teńge bolatyn 897 aıyppul salyndy.
Oblys ákimi janyndaǵy jedel shtab Qostanaı oblysynyń turǵyndaryn karantın talaptaryn qatań saqtaýǵa shaqyrady.
