Qostanaıda qar jaýýyna baılanysty polıtsııa qyzmeti kúsheıtildi
ASTANA. KAZINFORM — Búgin tańerteńnen Qostanaıda, sondaı-aq Qostanaı, Meńdiqara, Fedorov aýdandarynda qar aralas jańbyr jaýyp, aýa raıy kúrt ózgerdi.
Temperatýranyń nólden joǵary bolǵanyna qaramastan, joldar laılanyp, taıǵaqtanyp, birqatar jol apatyna sebep boldy.
Aýa raıynyń nasharlaýyna baılanysty patrýldik polıtsııa qyzmetkerleri jedel tártipke kóshti. Ásirese «Qostanaı — Almaty — Ekaterınbýrg» baǵytyndaǵy respýblıkalyq mańyzy bar jolǵa nazar aýdaryldy. Qarabalyq aýdany baǵytynda tańǵy saǵat 6:00 men 10:00 aralyǵynda joldan taıyp ketken toǵyz kólik shyǵaryldy.
Tas joldyń bir bóliginde «Alfard» jáne «Folksvagen» kólikteriniń júrgizýshileri rólge ıe bola almaı, joldan shyǵyp ketken. Kólikterdi qar qursaýynan shyǵarý úshin joldan ótip bara jatqan júk kóligi men basqa da júrgizýshiler kómekke kelip, patrýldik polıtsııa qyzmetin shaqyrdy.
Tártip saqshylary júrgizýshilerge kóriný nasharlaǵanda jáne taıǵaq jerlerde jol qozǵalysy erejelerin saqtaýdy eskertti.
Osyndaı aldyn alý sharalaryna qaramastan oblys ortalyǵynda 12 jol-kólik oqıǵasy bolǵan. Zardap shekkender joq, tek materıaldyq zalal týraly habarlandy. Jol-kólik oqıǵalaryna qashyqtyqty saqtamaý, jyldamdyqty arttyrý jáne manevr jasaýdaǵy qatelikter sebep boldy.
Sondaı-aq, qatty jel kezinde polıtseıler júrgizýshilerdi aǵash túbinde turmaýǵa shaqyrdy.
Búgin tańerteń ǵana polıtsııaǵa osyǵan uqsas oqıǵalar týraly 10 habarlama kelip tústi. Máselen, Abaı dańǵylyndaǵy ǵımarat aýlasynda Exeed kóliginiń ústine aǵash qulaǵan. Dál osyndaı oqıǵa Pavlova kóshesinde de bolyp, aǵash JAC kóligin zaqymdady. Eki jaǵdaıda da polıtsııa qyzmetkerleri aıǵaqtardy jınap, keltirilgen shyǵyndy anyqtap jatyr, qorytyndy boıynsha protsessýaldyq sheshim qabyldanady.
— Qostanaı oblysynyń polıtsııa departamenti kólik júrgizýshilerine aýa raıy boljamyn aldyn ala tekserip, baǵdarlaryn soǵan sáıkes retteýdi qatań túrde usynady. Qalada jaıaý júrginshiler ótkeline deıin jyldamdyqty azaıtyńyz, qaýipsiz qashyqtyqty saqtańyz, tas jolda jyldamdyqty asyrmaı, basyp ozý jáne basqa manevrlar aldynda jaǵdaıdy muqııat baǵalańyz, — dep atap ótti departament.
Esterińizge sala keteıik, búgin Qostanaı oblysynda alǵashqy qar jaýdy. Sonyń saldarynan birqatar aýdan jaryqsyz qaldy.