Qostanaıda qar qursaýynda qalǵan 20 balyqshy qutqaryldy
NUR-SULTAN. QazAqparat – Qostanaı oblysynda qar qursaýynda qalǵan 20 balyqshy qutqaryldy. Bul jaıynda QR ІІM Tótenshe jaǵdaılar komıtetinen málim etti, dep habarlaıdy QazAqparat tilshisi.
Vedomstvo málimetinshe, 13 qańtar kúni keshki saǵat 22:00 shamasynda Qostanaıdyń «112» qyzmetine Qostanaı aýdanynyń aýmaǵyndaǵy Jdanovka aýylynan 10 shaqyrym jerde Aqqabaq kólinde 20 balyqshynyń qar qursaýynda qalǵany týraly habarlama túsken. 11 kólikke minip, kólge shyǵyp ketken balyqshylar keshke aýylǵa qaıtar kezde boran soǵyp, jol boıyn bir metrge deıin qar basyp tastaǵan.
«Qıyn jaǵdaıǵa tap bolǵan balyqshylar qutqarý qyzmetine qońyraý shaldy. Qostanaı oblystyq TJD qutqarýshylary TREKOL jol talǵamaıtyn kóligimen kólge jetti. Sodan keıin barlyq balyqshylardy eki kezekpen Jdanovka aýylyna taqaý jerde tazartylǵan jol ýchaskesinde turǵan «KamAZ» kóligine jetkizdi. Saǵat 23:28-de qutqarýshylar men balyqshylar Qostanaı qalasyna bet aldy. Qutqarý operatsııasy sátti ótti, zardap shekkender joq», - dep atap ótedi komıtetten.
