Qostanaıda qar qursaýynda qalǵan 12 balyqshy qutqaryldy
QOSTANAI. QazAqparat - Qostanaı oblysynda qar qursaýynda qalǵan 12 balyqshy qutqaryldy, dep habarlaıdy QazAqparat.
Aqparatty oblystyq TJD baspasóz qyzmeti taratty. Oqıǵa Jangeldın aýdanynda bolǵan.
«Búgin, túngi 01:30 shamasynda Torǵaı selosynan 20 shaqyrym jerde qar qursaýynda qalǵan 5 jeńil avtokólikke kómek kórsetildi. Kólikterde barlyǵy 12 adam bolǵan. Olar Qabyrǵa ózenine balyq aýlaýǵa shyqpaq bolǵany anyqtaldy», -deıdi vedomstvonyń baspasóz qyzmetindegiler.
Qutqarýshylar avtokólikterdi qardan shyǵaryp, qaýipsiz jerge deıin súıretip jetkizdi. Balyqshylar medıtsınalyq kómekke júgingen joq. Oblystyq TJD borandy kúni alys jolǵa shyqpaýǵa keńes beredi.
