Qostanaıda «KamAZ» bólshekteri shyǵarylady
QOSTANAI. QazAqparat - Qostanaıdaǵy ındýstrııalyq aımaqta «KamAz» kompanııasynyń 3 ınvestıtsııalyq jobasy iske asady, dep habarlaıdy QazAqparat.
Oblys ákimdiginde ótken keńeıtilgen keńeste óńirdiń ınvestıtsııalyq áleýeti tanystyryldy. Basqosý barysynda Qostanaı oblysy ákiminiń orynbasary Erlan Qoıshybaev aldaǵy ýaqytta iske asyrylatyn jobalarmen tanystyrdy
«KAMAZ» kompanııasymen birlesip, ónerkásiptik kooperatsııa aıasynda jalpy quny 86 mlrd teńge bolatyn 3 jobany iske asyrý josparlanýda. Nátıjesinde oblysta 4 myń turaqty jumys orny ashylady. Áýeli, qýaty jylyna 86 myń birlikke jetetin «KAMAZ» jetekshi shanaǵynyń 2 túri óndiriledi. Ekinshi joba - «KamAz» arnaıy tehnıkasyna arnalǵan qondyrmalar qurastyrý. Jylyna mundaı 5000 birlik avtobólshek shyǵarylady. Úshinshi jobada oqshaý avtobólshekter (tejegish qalyptar, oryndyqtar, elektr suıyltqysh, rezeńke jáne plastıkalyq buıymdar) jasalady», - dep túsindirdi Erlan Qoıshybaev.
Budan bólek, avtobólshekterdiń sapasyn arttyrý, jumysshy kadr quramyn toltyrý, sondaı-aq ınjenerler men tehnologtardy daıyndaý maqsatynda ınjınırıng ortalyǵyn iske qosý múmkindigi pysyqtalýda.
Keleshekte munda «KamAz» kabınalary, qozǵaltqyshtar men radıatorlaryn óndirý jóninde kelissózder júrgiziledi. Atalmysh jobanyń barlyq kezeńderine shamamen 15 mlrd teńge jumsalady.
«Qoldanystaǵy avtokólikter, kommertsııalyq jáne aýyl sharýashylyǵy tehnıkalarynyń, sondaı-aq josparlanǵan jobalardyń baryn eskerip, oblysta avtomobıl jáne aýyl sharýashylyǵy mashınalary klasteri qalyptasýda. Úkimettiń ónerkásip salalaryn, shaǵyn jáne orta bıznesti qoldaý, qolaıly ınvestıtsııalyq ahýal jasaý jónindegi saıasaty óńirdiń negizgi makroekonomıkalyq kórsetkishteriniń ósýine oń áserin tıgizdi. Aldaǵy ýaqytta ónerkásipti damytý, bıznesti qoldaý jáne syrtqy ınvestıtsııalardy tartý jumystary jalǵasady», - dep túıdi oblys ákiminiń orynbasary.
Eske salsaq, osy ýaqytqa deıin Qostanaı oblysynda 47 myńǵa jýyq avtomobıl qurastyryldy.
