Qostanaıda qala kúni qalaı toılanady

QOSTANAI. QazAqparat - Qostanaı qalasynyń ákimdiginde 16-19 tamyzǵa josparlanǵan qala kúnine arnalǵan merekelik is-sharalar jarııalandy, dep habarlaıdy QazAqparat tilshisi.

Búgin qalalyq ákimdikte ótken apparat keńesinde Qostanaıda qala kúni qalaı toılanatyny belgili boldy.
«Qala kúnin merekeleý 16 tamyzda bastalyp, 4 kúnge sozylady. Halyqqa yńǵaıly bolý úshin qalanyń birneshe alańynda jappaı merekelik is-sharalar ótedi. Qostanaılyqtar men qala qonaqtary úshin ekskýrsııalyq avtobýstar, retro dıskoteka, shyǵarmashylyq ujymdardyń óner kórsetýi, kitap jáne kórkem kórme-jármeńkeler josparlanǵan.
Etnofestıval aıasynda aýqymdy baǵdarlama qarastyrylǵan. Bul - «Turkfest» respýblıkalyq festıvali, Qyzylorda jáne Qostanaı ansamblderiniń folklorlyq ujymdarynyń qoıylymdary, stıldengen ulttyq kıim toptamalaryn usynatyn «Zeken Moda» qazaqstandyq brendiniń etnoshoýy. Budan bólek, Almatydan kelgen «Orda» etnojobasynyń qazaq batyrlary óz baǵdarlamasyn usynady»,-dep baıandady qala ákiminiń baspasóz qyzmetinen.
Sondaı-aq shyǵarmashylyq, jastar, sport jáne oıyn alańdary uıymdastyrylady.
Qala kúnin merekeleýge shaqyrylǵan qonaqtar qatarynda dıdjeı Rýblev, The Jigits, Tanir&Tyomcha, Kalifarniya bar. Qala kúniniń basty hedlaıneri - belgili oryndaýshy Jah Khalib.
Qala kúnin merekeleýdi dástúrli otshashýmen aıaqtaý josparlanyp otyr.