Qostanaıda kadr daıarlaıtyn Injınırıng ortalyǵy ashylady
NUR-SULTAN. QazAqparat – Mashına jasaý salasynda kadr daıarlaý úshin Qostanaı oblysynda Injınırıngtik ortalyq ashylady, dep habarlaıdy QazAqparat tilshisi.
«Qostanaı qalasynda qýaty 50 myń tonnalyq quıma avtokomponentterin shyǵaratyn shoıyn quımasy zaýytynyń qurylysy týraly aıtyp ótkim keledi. KamAZ arnaıy tehnıkasynyń qozǵaltqysh bloktary, redýktorlaryna arnalǵan korpýstary jáne Qazaqstan mashına jasaý kásiporyndary úshin quıma elementteriniń óndirisi jolǵa qoıylǵaly otyr. Óndirilgen ónimniń 60 paıyzyn eksportqa shyǵarý josparda bar», - dedi Qostanaı oblysynyń ákimi Arhımed Muhambetov OKQ-da ótken baspasóz máslıhatynda.
Ákimniń aıtýyna qaraǵanda, mashına jasaý salasynda kásiporyn ashý isi joǵary bilikti kadrlardyń qajettiligin týǵyzady.
«Bul problemany Injınırıng ortalyǵyn ashý arqyly sheshý josparlanyp otyr. Ortalyqtyń bazasynda sondaı-aq ǵylymı-zertteý, tájirıbelik-konstrýktorlyq ázirlemeler júrgizý, sondaı-aq jańa buıymdar óndirisiniń tehnologııalaryn ázirleý jáne súıemeldeý jóninen ınjınırıngtik qyzmetter kórsetý kózdelýde. Buǵan qosa, Indýstrıaldyq aımaq aýmaǵynda temirjol vagondary úshin iri quıma óndirisin uıymdastyrý jónindegi joba pysyqtalyp jatyr. Mundaǵy ınvestor - «RegıonTransServıs» JShS. Investıtsııanyń boljamdy somasy – 47 mlrd teńge», - dedi ol.
