Qostanaıda iz-túzsiz ketken eki adam bir táýlik boıy qar astyndaǵy jertólede jatqan
NUR-SULTAN. QazAqparat – Qostanaı qalasynyń qutqarýshylary eki adamdy qutqardy, dep habarlaıdy QazAqparat tótenshe jaǵdaılar komıtetine silteme jasap.
23 qańtar kúni «112» qyzmetine Aqsaı aýylynan 35 shaqyrym jerde dalalyq alqap aýmaǵynda qıyndyqqa tap bolǵan eki adam jóninde qońyraý kelip túsken. Jerdi óńdeýge jańa tehnıkamen birge adamdar jiberilgen.
«Aýa raıynyń kúrt nasharlaýyna baılanysty olardy jedel evakýatsııalaý qajet bolǵan. Baılanys bolmaǵandyqtan tótenshe jaǵdaıǵa ushyraǵan adamdardyń ornalasqan jeri men jaǵdaıy beımálim bolǵan. Aqtútek borannan jol kórinbeıdi, soǵan qaramastan izdeý-qutqarý jumystaryn «Nıva Marsh – Bronto» kóligi júrgizdi. Qutqarý operatsııasyna Arqalyq qalasynyń bólimsheleri, onyń ishinde Qostanaı qalasynyń jedel-qutqarý jasaǵynyń qutqarýshylary Baıdildın J., Jarmaǵanbetov E., bas qutqarýshy Janaev A. qatysty. Qutqarýshylar bir táýlikten keıin olardy jertóleden taýyp alǵan» dep málim etti komıtetten.
«Tabylǵan azamattardyń jaǵdaıy birqalypty. Zardap shekkender Aqsaı aýylyna jetkizildi» delingen TJK habarlamasynda.
