Qostanaıda IT-tehnologııa mektebi ashylmaq
Oblys ákiminiń orynbasary bıylǵy Joldaýdyń mańyzdylyǵyna toqtala kele, óńirdiń bilim salasyndaǵy jetistikterin atap ótti.
«Elbasy ındýstrııalandyrý, aýyl sharýashylyǵy, kólik ınfraqurylymy, qarjy sektory, IT-tehnologııalar salalary týraly jan-jaqty túsindirip berdi. Sondaı-aq, Joldaýda adam kapıtalyn damytýǵa erekshe nazar aýdarylyp otyr. Sonyń ishinde densaýlyq saqtaý jáne bilim berý sapasyn arttyrýǵa basymdyq berilgen. Elbasy qoıǵan negizgi maqsat - básekege qabiletti, úsh tildi meńgergen, ozyq oıly jas urpaq qalyptastyrý. Osy maqsatta Qostanaı oblysynda da túrli bastamalar qolǵa alyndy. Mektepterdiń 87 paıyzy mýltımedııalyq jabdyqtarmen qamtamasyz etilgen. Oqýshylardyń ǵalamtorǵa shyǵý múkindigi 98,8% qurap otyr. Taǵy bir jańalyq oblysta tuńǵysh ret IT-tehnologııa mektebi ashylǵaly otyr», - dep atap ótti Marat Júndibaev.
Jalpy alǵanda, energetıka mınıstrliginiń saraptamalyq toby «EKSPO-2017» kórmesinde usynylǵan 105 sheteldik jáne 28 otandyq tehnologııany iriktep alǵan. Ákimdikter jumysqa engizý úshin 40 tehnologııany, ulttyq kompanııalar 15-in iriktep aldy.
Sonymen, IT-tehnologııa mektebi 1 qyrkúıekten bastap paıdalanýǵa beriledi. Ol «Ozat» daryndy balalarǵa arnalǵan mektep-ınternatynyń bazasynda qurylady. Sabaqtardyń deni aǵylshyn tilinde ótedi.
«Oqýshylar 3D úlgiler jasaý, saıt ázirleý, WEB-qosymshalar men anımatsııalyq baǵdarlamalardy meńgerýge múmkindik alady. Biz bul mektepke oblystan shalǵaı ornalasqan aýyldardan balalardy da tartamyz»,- dedi Júndibaev.
Óńir basshysy Arhımed Muhambetov bul usynysty qoldaıtynyn jetkizdi. Onyń sózinshe, bıyl oblystyń IT-tehnologııa salasyn damytýǵa 500 mln teńge bólinbek.
