Qostanaıda irimshiktiń 10 túrin óndiretin jańa keshen iske qosylady

ASTANA. QazAqparat – Qostanaı oblysynda qaıta óńdeý boıynsha 12 joba iske asyrylady. Bul týraly aımaq ákimi Qumar Aqsaqalov aıtty, dep habarlaıdy QazAqparat tilshisi.

Óńir basshysy Prezıdent tapsyrmasymen aýyl sharýashylyǵy ónimderin tereń óńdeýge barynsha kóńil bólinetinin aıtty. Qaıta óńdeýde 12 jobany iske asyrýǵa 80 mlrd teńgeden astam ınvestıtsııa salý josparlanýda.

«Germanııalyq Deutsches Milchkontor GmbH tarta otyryp, irimshiktiń 10 jańa túrin óndiretin keshen salynady («Mılh» JShS), bul irimshik óndirisiniń qýatyn arttyrýǵa, ımportqa táýeldilikti tómendetýge múmkindik beredi. Jobanyń quny – 7,2 mlrd teńge, qýaty – jylyna 2 myń tonna ónim», - dedi Q. Aqsaqalov elordada Ortalyq kommýnıkatsııalar qyzmetinde.

Onyń aıtýynsha, jańa zaýyttyń iske qosylýy óńdelgen sút úlesin 60%-ke deıin arttyrýǵa múmkindik beredi.

«Sondaı-aq, maıly daqyldardyń egis alqaptarynyń ulǵaıýy olardy qaıta óńdeý zaýytyn salý qajettiligin bildiredi. Sondyqtan jylyna 100 myń tonnaǵa deıin qaıta óńdeý qýaty bar maı ekstraktsııalyq zaýyt salý josparlanýda, jobanyń quny - 10 mlrd teńge. Nátıjesinde ósimdik maıynan basqa, kúnjara, shrot sııaqty qaıta óńdeý ónimderi alynady. Jańa kásiporyndardy qurý jáne jumys istep turǵan kásiporyndardy jańǵyrtý azyq-túlik qaýipsizdigin qamtamasyz etýge, shyǵarylatyn ónim kólemin ulǵaıtýǵa, jańa jumys oryndaryn qurýǵa yqpal etedi», - dedi Qumar Aqsaqalov.

Buǵan deıin Qostanaı ákimi áleýmettik azyq-túliktiń basym bóligi óńir ishinde shyǵarylatynyn aıtqan edi.