Qostanaıda iri jol apatyna kináli júrgizýshi jatqan aýrýhana palatasyna kúzet qoıyldy
QOSTANAI. QazAqparat - Kisi ólimine ákelip soqqan Qostanaıdaǵy iri jol apatyna «Infiniti» kóliginiń júrgizýshisi kináli bolýy múmkin, dep habarlaıdy QazAqparat tilshisi.
Buǵan deıin habarlaǵanymyzdaı, 21 qyrkúıek kúni Qostanaı qalasynyń Abaı dańǵylynda Infiniti men Peugeot kólikteri soqtyǵysty, olardyń biri ekpinmen kelip, mototsıkldi urǵan. Jol apatynan jolaýshylar avtobýsy da zardap shekken bolatyn. Soqqynyń qatty bolǵany sonshalyq mototsıkl temir úıindige aınalǵan, 32 jastaǵy kásibı baıker Evgenıı Pasechnık sol orynda kóz jumdy. Jeńil kólikterde bolǵan jolaýshylar aýrýhanaǵa jetkizildi.
Atalǵan oqıǵaǵa qatysty qozǵalǵan qylmystyq istiń tergelý barysyn protsessýaldyq prokýror óz baqylaýyna aldy. 25 qyrkúıek kúni «Infiniti» júrgizýshisi jol-kólik apatyna kináli dep tanylyp, tıisti qaýly shyqty.
«26 qyrkúıek kúni qylmystyq qýdalaý organy kólik júrgizýshisiniń isine qatysty kúdiktini kúzetpen ustaý túrindegi bultartpaý sharasyn sanktsııalaý jáne ótinish hatty qaraý nátıjesi boıynsha kúzetpen ustaý týraly qaýly shyǵardy», - dep atap ótti Qostanaı oblystyq prokýratýrasy basqarmasynyń bastyǵy Qaırat Júsipov.
Belgili bolǵandaı, kúdikti bastapqyda aýrýhananyń neırohırýrgııa bólimshesinde jatqan. Qazir ol aldyna kúzet qoıylǵan arnaıy palataǵa kóshirildi.
