Qostanaıda ınvestor quqyǵyn buzǵan 66 laýazymdy tulǵa jaýapkershilikke tartyldy
ASTANA. KAZINFORM — Qostanaı oblysynyń prokýratýrasynda oblys prokýrory Marat Seksembaevtyń «Atameken» Ulttyq kásipkerler palatasy Prezıdıýmynyń tóraǵasy Qanat Sharlapaevpen jumys kezdesýi ótti.
Kezdesý barysynda oblys prokýrory óńirde sońǵy úsh jylda kásipkerlerdiń quqyqtaryn qorǵaý jáne ınvestıtsııalyq jobalardy súıemeldeý boıynsha atqarylǵan jumystar týraly aqparat berdi.
— Atap aıtqanda, qabyldanǵan sharalar nátıjesinde 15 myńǵa jýyq kásipkerdiń quqyqtary qorǵaldy, 15 zańsyz shekteý sharasy joıylyp, 9 zańsyz tekserýdiń joly kesildi. Kásipkerlik sýbektileri men ınvestorlardyń quqyqtaryn buzǵany úshin 66 laýazymdy tulǵa túrli jaýapkershilik túrlerine tartyldy. Prokýratýra tarapynan jalpy somasy 1,7 trln teńgeni quraıtyn 33 ınvestıtsııalyq jobaǵa súıemeldeý qamtamasyz etildi, — delingen habarlamada.
Jergilikti atqarýshy organdarmen, Óńirlik kásipkerler palatasymen jáne ózge de ýákiletti organdarmen birlesip 57 problemalyq másele sheshimin tapty.
Qazir jalpy somasy 3,3 trln teńgeni quraıtyn, óńirde 15 myń jumys ornyn qurýdy kózdeıtin taǵy 172 joba súıemeldenedi. Árbir jobaǵa jaýapty prokýrorlar bekitilgen.
Marat Seksembaev ınvestıtsııalyq jobalardy súıemeldeý, onyń ishinde quqyqtyq qorǵaý men qoldaý, olardy iske asyrýdyń barlyq kezeńderinde júzege asyrylatynyn atap ótti. Óz kezeginde Qanat Sharlapaev árbir kásipker ózin zańmen qorǵalǵanyn sezinýi mańyzdy ekenin aıtty.
Sondaı-aq ol prokýratýra — bıznestiń ótinishterine jedel áreket etý jáne ákimshilik kedergilerdi joıýda negizgi seriktes sanalatynyn atap ótti.
Buǵan deıin Qyzylordada sheteldik ınvestor kezikken máselege prokýrorlar aralasqanyn jazdyq.
