Qostanaıda ınvestıtsııalyq jobalarǵa jemqorlyqqa qarsy departament súıemeldeý júrgizedi
«Bizdiń qyzmettegi basym baǵyttardyń biri bıznesti qorǵaý. Bul sala boıynsha bizdiń departamentpen 50 sybaılas jemqorlyqqa qarsy birlesip áreket etý kelisimi jasaldy. Biz olardy únemi súıemeldep otyramyz. Biz súıemeldeıtin kompanııalardyń ınvestıtsııa kólemi 364 mlrd teńgeni quraıdy. Bıyl ınvestorlardan 18 ótinish kelip tústi. Onyń ishinde 10 ótinish óńirlik kásipkerler palatasynyń qyzmetine qatysty, sonyń ishinde 7 ótinish «Atameken»-niń problemaly suraqtar reestrine tirkeldi. Jalpy kelip túsken suraqtar men ótinishterdiń barlyǵyna tolyq jaýap berildi. Árıne tereń taldaýdy talap etetin máselelerdi sheshýde biz sala mamandaryn, sarapshylar men qoǵam belsendilerin tartamyz», - dedi QR Sybaılas jemqorlyqqa qarsy is-qımyl agenttigi Qostanaı oblystyq departamentiniń dırektory Qýanysh Bekbasov onlaın ótken baspasóz máslıhatynda.
Sondaı-aq, departament basshysy óńirde shaǵyn jáne orta bıznes sýbektisi qyzmetine sheneýniktiń kirisýi oqıǵalary anyqtalǵanyn aıtty. Odan bólek, 2 is sotqa jiberilgen.
Osy oraıda Q. Bekbasov memleket bıznesti qorǵaýǵa árdaıym daıyn ekenin aıta kele, bıznes ókilderin sybaılas jemqorlyq áreketterdiń aldyn alýǵa shaqyrdy.
Buǵan deıin atalǵan óńirde aýyl sharýashylyǵyn sýbsıdııalaýdyń ashyqtyǵyna taldaý júrip jatqanyn habarlaǵan bolatynbyz.
Odan bólek, aımaqtyq Antıkor basshysy Qostanaı oblysynda jemqorlyq qylmystar zalalynyń 99,9%-y qaıta qalpyna keltirilgenin málimdedi.
