Qostanaıda ınternet-dúkender arqyly 470 mln teńge jymqyrǵan áıel sottaldy

QOSTANAI. KAZINFORM – Qostanaıda ınternet-dúkender arqyly alaıaqtyq jasaǵan áıeldiń isi sotta qaraldy.

Sot málimetinshe, aıyptalýshy óz atyna tirkelgen jeke kásipkerlik arqyly «Kaspi Magazın» jáne «HalykMarket» platformalarynda taýarlardy bólip tóleýge rásimdeýdi usynǵan. Ol «0-0-12» jáne «0-0-24» baǵdarlamalary arqyly taýar alýdy uıymdastyryp, bastapqyda mindettemelerdi oryndaýdy kózdemegen. Túsken qarajatty qolma-qol aqshaǵa aınaldyryp, jeke qajettilikterine jumsaǵan.

Sonymen qatar, áıel óńirdegi resmı aıyrbastaý pýnktterinen tıimdirek baǵam usyna otyryp, lıtsenzııasyz valıýta aıyrbastaý qyzmetin de usynǵan. Klıentterden alynǵan qarajatty ol jeke paıdasyna ıemdenip otyrǵan.

Sot barysynda aıyptalýshy kinásin ishinara moıyndady, toǵyz epızod boıynsha tolyq, al 430 mln teńgeden asatyn bir epızod boıynsha kinásin moıyndamaǵan.

Sot jeńildetetin mán-jaılar retinde ókinýi men kámeletke tolmaǵan balalarynyń bolýyn eskerdi. Nátıjesinde oǵan ortasha qaýipsizdik mekemesinde 6,5 jyl bas bostandyǵynan aıyrý jazasy taǵaıyndalyp, qarjylyq qyzmetpen aınalysýǵa 5 jylǵa tyıym salyndy.

Sonymen qatar, jaza óteý 5 jylǵa keıinge qaldyryldy.

Jábirlenýshilerdiń azamattyq talap-aryzdary tolyq kólemde qanaǵattandyryldy. Úkim zańdy kúshine engen joq.

Aıta keteıik, Qostanaıda 3 mlrd teńge sýbsıdııa jymqyrý isi boıynsha úkim shyqty.