Qostanaıda ınternet-alaıaqtarǵa baılanys nómirlerin tirkeýge kómektesken kúdikti ustaldy
QOSTANAI. KAZINFORM – Qostanaı oblysy polıtsııa departamentiniń kıberqylmysqa qarsy is-qımyl basqarmasynyń qyzmetkerleri ınternet-alaıaqtar úshin sım-kartalardy belsendendirýmen aınalysqan 26 jastaǵy oblys turǵynyn tutqyndady.
QR Іshki ister mınıstrliginiń málimetinshe, áıel belsendirilgen nómirlerge WhatsApp messendjerinde akkaýnttar tirkep, keıin olarǵa qoljetimdilikti úshinshi tulǵalarǵa berip otyrǵan. Dál osyndaı nómirler arqyly alaıaqtar azamattarǵa qońyraý shalyp, habarlamalar jiberip, ózderin bank qyzmetkerleri, quqyq qorǵaý organdarynyń ókilderi nemese túrli uıymdardyń qyzmetkerleri retinde tanystyrady.
Polıtseılerdiń anyqtaýynsha, áıel SIM-kartalardy belsendendirý arqyly tabys tapqan. Tólemder krıptovalıýta arqyly túsip, keıin qarajat banktik shottarǵa shyǵarylyp otyrǵan.
– Tintý barysynda 6 telefon, 3 planshet jáne ártúrli baılanys operatorlaryna tıesili shamamen 400 SIM-karta tárkilendi. Atalǵan fakti boıynsha qylmystyq is qozǵaldy. Qazirgi ýaqytta tergeý áreketteri júrgizilip, oqıǵanyń barlyq mán-jaıy men múmkin bolatyn sybaılastary anyqtalyp jatyr, - delingen habarlamada.
Polıtsııa alaıaqtar kóbine messendjerler men bógde tulǵalardyń atyna rásimdelgen nómirlerdi paıdalanatynyn eske salady. Azamattardan saq bolýdy, jeke derekterin bermeýdi jáne belgisiz adamdardyń ótinishi boıynsha qarjylyq operatsııalar jasamaýdy suraıdy.
Budan buryn Pavlodarda kıberpolıtseıler zeınetkerdiń 5 mln teńgesin alaıaqtardan saqtap qalǵanyn jazǵanbyz.
