Qostanaıda iKomek ahýal ortalyǵy ashyldy
iKomek ortalyǵynyń negizgi qyzmeti - turǵyndardyń ótinishterin qabyldaý, kommýnaldyq jáne jedel qyzmetterdiń jumysyn úılestirý. Negizi osy jyldyń 1 aqpanynan bastap 109 biryńǵaı nómiri engizilgen. Keıin kommýnaldyq memlekettik mekeme quryldy.
«Elbasy bastamasymen qurylǵan «Tsıfrlyq Qazaqstan» baǵdarlamasy aıasynda ashyq kedergisiz keńistikte bir tereze qaǵıdasy boıynsha, halyqqa qyzmet kórsetý júıesin engizý tapsyrylǵan bolatyn. Qazir bizdegi shaǵyn ortalyqta 12 adam jumys isteıdi, onyń ishinde ákimshilik 4 birlik jáne 8 operator bar. Nur-Sultan qalasynyń iKomek bazasynyń tájirıbesi boıynsha operatorlar bazasy, nusqaýlyqtar jasaldy. Elordada baqylaý jáne jedel áreket etý ortalyǵy 2018 jyldyń basynan jemisti qyzmet etip keledi», - dedi ortalyqtyń dırektory Marǵulan Álqýatuly.
iKomek ortalyǵy qalanyń tynys-tirshiligine monıtorıng jasap, taldaý júrgizedi. Oblys ákimi Arhımed Muhambetovtiń aıtýynsha, bul ortalyq qaladaǵy túıindi máselelerdi ýaqtyly sheshý maqsatynda jumys isteýi tıis.
«Qalanyń bir shetinde turatyn kósheniń turǵyny problemasyn aıtyp habarlasty delik. Sonymen qatar qalanyń ekinshi shetinde basqa másele týyndady. Bul kezde qalaı áreket etesizder? Soǵan daıyn bolý qajet. Áıtpese, bul ortalyqtyń mańyzy shamaly. Kerek bolsa, kadr sanyn kóbeıtińizder. Bastysy, turǵyndardyń ótinishteri der ýaqytynda qaralyp, tıisti atqarýshy organdarǵa jiberilýi tıis», - dedi Arhımed Muhambetov.
Qostanaıdaǵy iKomek 3 baǵytta jumys isteıdi. Áýeli, qala turǵyndary men qonaqtarynyń ótinishterin 4 operator qabyldaıdy. Odan ári 4 ınspektor suraqtyń sapasy men mazmunyn baqylap, atqarýshy organdarǵa baǵyttaıdy. Úshinshiden, barlyq múddeli qyzmet turǵynnyń ótinishin qarastyryp, sheshimin beredi.
Osy ýaqytqa deıin 40-tan astam memlekettik organda, halyqqa qyzmet kórsetetin vedomstvolyq jáne merdigerlik uıymdarǵa tekserý júrgizildi. Barlyǵy 1000-nan astam qyzmet iriktelip, tıisti reglament ázirlendi.
«Qostanaı - adaldyq alańy» jobalyq keńsesi «Qoljetimdi ákimdik» jobasyn usyndy. Munda qala turǵyndary memlekettik qyzmetterdi «bir tereze» qaǵıdaty boıynsha alady. Sebebi, búginde TKSh, turǵyn úı qatynastary, densaýlyq saqtaý, bilim berý, jumyspen qamtý jáne áleýmettik qorǵaý, saýda jáne kásipkerlik, aýyl sharýashylyǵy jáne veterınarııa salalary boıynsha suranymdar kóbeıgen.
Qalalyq ákimdik «Vatsap», «Instagram», «Feısbýk» áleýmettik jelileri jáne telegram chat-bottar boıynsha ótinishterdi qabyldaýdy uıymdastyrmaq. Sondaı-aq, «Smart Qostanaı» mobıldi qosymshasyn biriktirý jáne qalanyń áleýmettik-mańyzdy obektileri úshin beıne baqylaý kameralaryn shyǵarý josparlanýda.
