Qostanaıda ıesiz turǵan úı órtenip ketti
QOSTANAI. QazAqparat - Oblys ortalyǵyndaǵy jeke turǵyn úılerdiń birinen órt shyqty, dep habarlaıdy QazAqparat tilshisi.
Oqys oqıǵa búgin tańerteń 08:20 shamasynda Altynsarın kóshesindegi úılerdiń birinde bolǵan.
«Bul úı birneshe jyldan beri ıesiz tur. Úı aınalasynda qańǵybastar kóp júredi, únemi aıqaı-shý bolyp jatady», - deıdi oqıǵa kýágeri Samat Jankeldın.
TJ bólimi qyzmetkerleri órtti 1 saǵattyń ishinde sóndirdi.
«Órt sóndirýshilerdi kórshileri shaqyrdy. Barlyǵy 5 arnaıy tehnıka jumyldyryldy. Qyzmetkerler kelgenshe, úıdiń eki bólmesin jalyn sharpyǵan. Tereze jaqtaýlary, kireberis bólmeniń shatyry túgeldeı janyp ketti. Órttiń naqty sebepteri anyqtalýda»,- dep málim etti oblystyq TJD-nyń baspasóz qyzmeti.
TJ mamandary kelgen kezde baspana aınalasynda turǵylyqty mekenjaıy joq eki adam bolǵan. Qazirgi tańda qyzmetkerler úıdiń ıesin izdestirip jatyr.
