Qostanaıda halyqaralyq ІT-mekteptermen telekópir ótti
QOSTANAI. QazAqparat - «Nur Otan» partııasynyń Qostanaı oblystyq fılıalynda halyqaralyq ІT-mekteptermen «Balalarǵa arnalǵan tegin ІT-synyptar» atty telekópir ótkizildi, dep habarlaıdy QazAqparat.
Áýeli, AQSh-tyń Kremnıı alqabynyń ǵalymdary qazaqstandyqtarǵa óz tájirıbelerin tanystyrdy. Qazaqstannyń barlyq aımaqtary qosylǵan telekópir qatysýshylary «Bolashaqtyń álemi búgin: tsıfrlyq oılaý men ІT-tehnologııalar» taqyrybyn talqylady.
«Elimiz boıynsha 125 joǵary oqý orny bar. Olardyń 80-nen astamy tehnıkalyq-ınjenerlik baǵyttta bilim berýge qaýqarly. «Nur Otan» partııasy aldaǵy 10 jylǵa jańa mindetter qoıyp otyr. Sonyń biri ınnovatsııalyq bilim berý úrdisin odan ári arttyrýǵa baǵyttalǵan. Qostanaı oblysynda bul maqsattaǵy jumystar bastalyp ketti. Tegin ІT-synyptar ashylyp, oqýshylardyń ıgiligine berildi», - dedi «Nur Otan» partııasy Qostanaı oblystyq fılıalynyń baspasóz hatshysy Erbolat Ahanov agenttik tilshisine.
Telekópir quraldary boıynsha baılanysqa AQSh-tyń jetekshi JOO men ІT-ındýstrııasynyń ókilderi shyǵyp, spıkerler ІT-oqytýdaǵy jańa tásilder men zamanaýı baǵdarlamalar týraly áńgimeledi. Máselen, Tilek Mamutov - Amerıkadaǵy Google kompanııasynyń baǵdarlamashysy. Ol telekópir arqyly «Google H» jobasy aıasynda ınnovatsııalyq ónimge qol jetkizgendigin aıtty. Ol 2017 jyly Perýde bolǵan tabıǵı apatta birneshe kún ishinde ınternet jelisin taratatyn dron oılap tapqan.
Nurlybek Mursalıev Stenford Ýnıversıtetiniń doktoranty. Jas ǵalym búginde, bıotehnologııany jańa trendtermen ushtastyra otyryp, tyń jańalyqtar ashqan. Telekópir barysynda ózge de, qandastarymyz ІT salasyn ári qaraı oqytý jáne bilimdi qoldaný tájirıbesin ortaǵa saldy. Telekópir suraq-jaýap túrinde ótti. Sharaǵa qatysqandar óz suraqtaryn joldap, tushymdy jaýap ala aldy.
