Qostanaıda halyqaralyq ınvestıtsııalyq forým jalǵasýda
Forýmnyń birinshi kúni sheteldik meımandar Qostanaıdaǵy iri ónerkásip oryndarynyń jumystarymen tanysqan. Olar «Sokolov-Sarybaı» kenishi, Jas qanat - 2006» qus fabrıkasy, «Baıan sulý» kondıter fabrıkasynda bolyp, óndiris oshaqtarymen kásipkerlik baılanys ornatýǵa nıetti ekenin jetkizdi. Qazaqstanmen tyǵyz áriptestik ornatqan halyqaralyq qarjy uıymynyń biri - Azııa damý banki. Elimiz atalǵan bankke múshe bolǵan 23 jylda 5 mlrd AQSh dollarynyń qarjylandyrýy júrgizildi. Bul kórsetkish byltyrdyń ózinde 200 mln dollardy qurasa, bıyl olar nesıeleýdi 40% arttyrýdy kózdep otyr. Bul týraly Azııa damý bankiniń Qazaqstandaǵy turaqty ókildiginiń dırektory Djovannı Kapanellı baıandady.
«Qostanaı oblysy Qazaqstannyń aýyl sharýashylyǵy sektoryna súbeli úles qosyp kele jatqan óńir ekenin estidim. Biz ekonomıkalyq ártaraptandyrý arqyly mamandandyrylǵan ınvestıtsııalardy qoldaýǵa ázirmiz. Nazarbaev ýnıversıteti kásipkerlikti damytý mamandyǵy boıynsha mamandar daıarlap jatyr. Endi osy arqyly sizderdiń oblystaryńyzben de baılanysymyzdy nyǵaıtamyz degen oıdamyn. Munymen qosa, Azııa damý banki Ózbekstannyń Tashkent, Samarqand, Ferǵana qalalarynda kóterme-úlestirý ortalyqtary qurylysynyń tujyrymdamasy men tehnıkalyq-ekonomıkalyq negizdemesin daıyndap jatyr», - dedi Djovannı Kapanellı.
Halyqaralyq ınvestıtsııalyq forýmǵa Reseı, Belarý, Ózbekstan, Polsha jáne Egıpetten 100-ge jýyq kásipker qatysýda. Búgin ótetin 4 paneldi sessııada 40-tan astam sarapshy óz jobalaryn usynady. Sondaı-aq, Qostanaı oblysy shet eldermen áriptestik baılanys aıasynda 26 memorandýmǵa qol qoımaq.