Qostanaıda «Gazelmen» boıjetkendi qasaqana basyp ketken júrgizýshige qatysty is qozǵaldy
QOSTANAI. QazAqparat - Mas kúıinde boıjetkendi júk kóligimen úsh márte soǵyp ótken 33 jastaǵy júrgizýshi sot aldynda jaýap beredi, dep habarlaıdy «Qazaqparat» HAA tilshisi.
Іsti Qostanaı oblysynyń qylmystyq isteri boıynsha mamandandyrylǵan aýdanaralyq soty qaraıdy.
Oqıǵa 15 shildede túngi saǵat 01:15 shamasynda bolǵan. Qostanaı oblysynyń turǵyny B. Zatobol kentindegi «Qyzyldash» dámhanasynda A. jáne G. esimdi eki boıjetkenge qol jumsaǵan.
«Kólik quralyn basqarý quqyǵynan aıyrylǵan azamat B. mas kúıinde saǵat 01:30 shamasynda «Gazelá kóligine otyryp, dámhananyń jazǵy alańynda turǵan G.-ny úsh márte basyp ótken. Bul kezde jábirlenýshi boıjetken dostarymen birge taksı kútip turǵan» - delingen Qostanaı oblystyq sotynyń baspasóz habarlamasynda.
25 jastaǵy G. birden qalalyq aýrýhanaǵa jetkizildi. Aýyr dene jaraqattaryn alǵan boıjetken qazir Reseıdiń Chelıabınsk qalasynda emdelýde.
Al azamat B. QR Qylmystyq kodeksiniń birneshe baby boıynsha aıyptalýda.
