Qostanaıda gaz-aýa qospasy jarylyp, eki adam jaraqat aldy
QOSTANAI. QazAqparat - Qostanaı oblysynyń Qarasý aýdanynda gaz-aýa qospasy jarylyp, saldarynan sharýa qojalyǵynyń jumysshylary zardap shekti, dep habarlaıdy QazAqparat oblystyq TJD baspasóz qyzmetine silteme jasap.
Oqıǵa Janyspaı aýylynda, jergilikti sharýa qojalyǵynyń qoımasynda bolǵan.
«Qoımada gaz-aýa qospasy jaryldy, saldarynan úı-jaıdyń terezeleri synyp, jalpy aýdany 10 sharshy metr aýmaqta jıhaz órtendi. Órt jumysshylardyń kúshimen sóndirildi. 1991 jyly týǵan azamat eki qolynyń 1,2 dárejeli jumsaq tininiń kúıigi men oń jaq býynynyń kesilgen jaraqaty dıagnozymen aýrýhanaǵa túisti», - delingen TJD baspasóz habarlamasynda.
Sonymen qatar kúıik shalǵan 1981 jylǵy jumysshy da aýrýhanaǵa jetkizildi.
Órttiń negizgi sebepteri anyqtalyp jatyr.
